माओवादीसँगको सहकार्य २०८४ सालसम्मै कायम रहन्छ : शंकर पोखरेल

काठमाडौं । नेकपा (एमाले) का महासचिव शंकर पोखरेलले एमाले उज्यालो भविष्यको यात्रामा रहेको बताएका छन् । पार्टीको जनसंगठन समन्वय संयन्त्रद्वारा राजधानीमा आयोजित राष्ट्रिय महिला भेलाको हिजो (बिहीबार) समापन कार्यक्रममा महासचिव पोखरेलले उक्त कुरा स्पष्ट गरेका हुन् ।

वर्तमान सरकारमा एमालेको उपस्थिति कमजोर रहेको टिप्पणीहरू हुने गरेको सन्दर्भमा महासचिव पोखरेलले एमालेले तत्कालका बारेमा मात्र नसोचेको र भविष्यमा बारेमा ध्यान केन्द्रित गरिरहेको बताए । एमाले जनतामा सबैभन्दा लोकप्रिय पार्टी हुँदाहुँदै पनि घेराबन्दीमा परेको अवस्थालाई अन्त्यका लागि अहिलेको समीकरण बनाइएको र यसलाई २०८४ को निर्वाचनसम्म कायम राख्ने बताए ।

पोखरेलले भने,–‘नेकपा (एमाले)लाई भविष्यको निर्णायक शक्तिको रूपमा स्थापित गर्ने र कसैको सहारा विना बहुमतको सरकार निर्माण गर्ने उदेश्यका साथ यात्रामा जुटेका छौं, हामी आजको सोचिरहेका छैनौं, भविष्यका लागि सोचिरहेका छौँ । उज्यालो भविष्यको यात्रातर्फ हामीले आफूलाई केन्द्रित गर्न लागिरहेका छौं ।’