काठमाडौँ । सरकार आगामी आर्थिक वर्षको बजेट घोषणाका लागि अन्तिम तयारीमा जुटेको छ । सोमबार रातीसम्म बजेट लेखन सकेर छपाई नै भइसकेको बजेट पारितका लागि मन्त्रीपरिषद्को बैठक बसिरहेको छ । मन्त्रीपरिषद्ले पारित गरेपछि अर्थमन्त्री वर्षमान पुनले आगामी वर्षको बजेट संसद्को संयुक्त बैठकमा भाषण गर्नेछन् ।
आगामी आर्थिक वर्षको बजेट भाषण गर्दैगर्दा चालू वर्षको बजेट कार्यान्वयनको स्थिति भने कमजोर देखिएको छ । सरकारले चालू आर्थिक वर्षका लागि १७ खर्ब ५१ अर्ब रुपैयाँको बजेट ल्याएको थियो । पछि अर्धवार्षिक समीक्षामार्फत आकार घटाएर १५ खर्ब ३० अर्बमा झार्यो ।
डा. प्रकाशसरण महतले चालू वर्षको बजेट ल्याएका थिए । उनले चालू वर्षका लागि महत्त्वाकाङ्क्षी बजेट प्रस्तुत गर्दै विगतको परिपाटी तोडेर कार्यान्वयनमा जोड दिने दाबी समेत गरेका थिए । तर अर्थतन्त्रमा गहन ज्ञान राखेका भनिएका डा. महल समेत कार्यान्वयनको पाटोमा फितलो देखिए । उनको कार्यकालमा समेत पुँजीगत खर्च नहुने पुरानै रोग देखियो ।
लक्ष्यअनुसारको बजेट खर्च गर्न नसकेपछि डा. महतले अर्धवार्षिक समीक्षामार्फत बजेटको आकार घटाएर १५ खर्ब ३० अर्बमा झारेका थिए । आकार घटेपछिको अवस्थामा समेत सरकारले बजेट खर्च बढाउन सकेको छैन । अर्थमन्त्री वर्षमान पुनले जिम्मेवारी सम्हालनेक्रममा पुँजीगत खर्चलाई प्राथमिकतामा राख्ने बताएका थिए ।
महालेखा नियन्त्रकको कार्यालयका अनुसार मंगलबारसम्म सरकारले ४१.४१ प्रतिशत मात्रै पुँजीगत खर्च गर्न सकेको छ । मंगलबारसम्म सरकारले १ खर्ब २५ अर्ब रुपैयाँ पुँजीगत खर्च गरेको छ । यस्तै ६८.७२ प्रतिशत चालू खर्च गरेको छ । मंगलबारसम्म सरकारले ७ खर्ब ८५ अर्ब ८० लाख रुपैयाँ चालू खर्च गरेको हो ।
यसबाहेक वित्तीय ६६.७ प्रतिशत खर्च भएको छ । मंगलबारसम्म २० अर्ब ५० करोड वित्तीय खर्च भएको महालेखाले बताएको छ । यी सबै खर्चलाई जोड्दा राज्यले कूल लक्ष्यको ६३.७२ प्रतिशत खर्च गरेको हो । जुन, ११ खर्ब १५ अर्ब हुन आउँछ ।
यसबाहेक यता आम्दानीतर्फ समेत सरकारले लक्ष्यको ६०.३७ प्रतिशत राजश्व संकलन गरेको छ । चालू वर्षमा १४ खर्ब ७२ अर्ब ४८ करोड रुपैयाँ राजश्व संकलनको लक्ष्य लिइएको छ । यसमध्ये ८ खर्ब ८८ अर्ब रुपैयाँ संकलन भएको छ । आम्दानी र खर्चको स्थिति हेर्दा सरकारले बजेट भाषणका क्रममा २०८० जेठ १५ मा लिएको लक्ष्य पुरा हुने देखिँदैन ।
यस्तै आम्दानीको तुलनामा खर्च बढी हुँदा सरकारको बजेट घाटाको खाडल बढेर २ खर्ब २७ अर्ब पुगेको छ । मंगलबारसम्म ११ खर्ब १५ अर्ब रुपैयाँ खर्च हुँदा ८ खर्ब ८८ अर्ब रुपैयाँ मात्रै आम्दानी हुँदा सरकारको बजेट घाटा २ खर्बमाथि देखिन्छ । यसबाट सरकार बजेटअनुसारको खर्च गर्न स्रोत अभावबाट गुज्रिरहेको पुष्टि हुन्छ ।
प्रतिक्रिया दिनुहोस
सफल खबर संवाददाता
मंगलबार, १५ जेठ २०८१, १५ : २४
लेखकबाट थप
सम्बन्धित समाचारहरु
भदौ दोस्रो साताभित्र बजेट ल्याइसक्ने लिखित प्रतिबद्धता
एक सयभन्दा बढी स्थानीय तहले अझै ल्याएनन् बजेट
अर्थ मन्त्रालयद्वारा बजेट कार्यान्वयनसम्बन्धी मन्त्रालयगत छलफल सुरु
काठमाडौं महानगरले ल्यायो २५ अर्ब ७६ करोडको बजेट
काठमाडौँ महानगरको बजेट आइतबार ल्याइने
सुदूरपश्चिमको बजेट प्रदेश सभाबाट पारित