विश्वका सर्वाधिक वायु प्रदूषित १०० सहरमा ८३ ओटा भारतका

प्रतिवेदनमा विश्वका ७ हजार ८०० ओटा भन्दा धेरै सहरका वायु स्तरको विश्लेषण गरिएको थियो । यी मध्ये ९ प्रतिशतमा मात्रै स्तर डब्ल्यूएचओको मापदण्ड अनुसारको थियो। संगठनले पीएम २.५ को औसत वार्षिक स्तर ५ माइक्रोग्राम प्रति क्युबिक मिटरभन्दा बढी हुन नहुने बताएको छ ।

गएको वर्ष उत्तर भारतको बिहार राज्यमा पर्ने बेगुसराई विश्वको सबैभन्दा प्रदूषित सहर थियो । यहाँको औसत वार्षिक पीएम २.५ ११८ दशमलव ९ रहेको थियो ।

यो डब्ल्यूएचओको निर्देशिकाभन्दा २३ गुणा बढी हो । यो सूचिमा गुवाहाटी, असम, दिल्ली, पन्जाब लगायत सहरहरू पनि छन् । खराब वायु प्रदूषण भएका देशहरूको सूचिको शीर्ष स्थानमा एसियाली देशहरू नै छन् ।

सूचिको शीर्ष स्थानमा बङ्गलादेश, पाकिस्तान र भारत क्रमशः पहिलो देखि तेस्रो स्थानमा छन् । नेपाल सर्वाधिक प्रदूषित देशको सूचिमा आठौँ स्थानमा थियो । नेपालको वार्षिक पीएम २.५ ४२ दशमलव ४ रहेको थियो । यो भनेको डब्ल्यूएचओले तोकेको भन्दा करिब साढे ८ गुणा बढी हो ।