सरकारको दोधारे चरित्र देखियो : विप्लव

काठमाडौँ । नेपाल कम्युनिष्ट पार्टीका महासचिव नेत्रविक्रम चन्दले सरकारको भूमिकाप्रति आशङ्का व्यक्त गरेका छन् । कपिलवस्तुमा बसेको पार्टी केन्द्रीय कमिटीको बैठकमा उनले आफूसहित पार्टी नेताहरुविरुद्ध पक्राउ पुर्जी जारी हुँदा प्रधानमन्त्री पुष्पकमल दाहाल ‘प्रचण्ड’को मौनताप्रति आशङ्का व्यक्त गरेका हुन् ।

उनले भने, ‘सरकारका प्रमुख ‘प्रचण्ड’ समाजवादी मोर्चामा बस्ने र त्यही मोर्चाको अर्को सदस्यसहितका नेतामाथि पक्राउ पुर्जी जारी हुँदा मौनता साध्नुले सरकारको दोधारे चरित्र देखिन्छ ।’उनले समाजवादी मोर्चाको तर्फबाट जारी विज्ञप्तिको स्वागत गरे । महासचिव चन्दले सरकारले आफूहरूमाथिको पक्राउ पुर्जीबारे धारणा स्पष्ट नगरे माओवादी केन्द्रसँगको सहकार्यमा पुनर्विचार गर्नुपर्नेसम्मको धारणा राखे ।

उनले समाजवादविरोधी पहिचानको नारा पुँजीवादी नारा भएको टिप्पणी गरे ।यस्तै प्रवक्ता ‘प्रकाण्ड’ले दलाल व्यवस्थाको सङ्कट टार्न र नेकपालाई कमजोर बनाउन साम्राज्यवादी षड्यन्त्र भइरहेको बताए ।उनले भने, ‘साम्राज्यवादी षड्यन्त्रको नयाँ अभ्यास अदालतको पक्राउ पुर्जीबाट देखिएको छ । साम्राज्यवादले एकातिर हाम्राविरुद्ध षड्यन्त्र गरिरहेको छ भने अर्कोतिर यो व्यवस्थामा आएको सङ्कट टार्न आफ्नो कट्टर प्रतिनिधि खोजिरहेको छ । त्यसका लागि अहिलेका पात्रको ठाउँमा नयाँ पात्र खोजिरहेको छ ।’

बैठकले महासचिव विप्लवले पेश गरेको ‘विशेष परिस्थितिको विशेष कार्यभार, दृढताका साथ पूरा गरौँ’ भन्ने शीर्षकको राजनीतिक तथा सङ्गठनात्मक प्रस्ताव पारित गरेको छ ।