धुम्बाराहीको जुवा अड्डामा मध्यराति प्रहरीको छापा, ७ जना पक्राउ

काठमाडौँ । धुम्बाराहीमा सञ्चालित जुवा अड्डामा प्रहरीले गएराति छापा मारेको छ । गएराति साढे २ बजे छापा मारेर ७ जना जुवाडेहरुलाई पक्राउ गरिएको जिल्ला प्रहरी परिसर काठमाडौँका एकजना अधिकृतले बताए ।

धुम्बाराही पिपलबोटस्थित सुन्दर कार्कीले बनाएको दुईतले जस्ताको टहराको भुँइ तलामा जुवा खेलेको सुराकको आधारमा महाराजगञ्जका डिएसपी अमर थापा नेतृत्वको टिमले छापा मारेको हो ।

जुवाखालबाट पक्राउ पर्नेमा दोलखा घर भएका ४० वर्षीय किरन थापा, भक्तपुरको सूर्यविनायक घर भएका सुशील लामा, दोलखाका सुन्दर कार्की, रामेछापका सुमन श्रेष्ठ, धादिङका कुमार रोका, हेटौंडा घर भएका कृष्णबहादुर मोक्तान र खोटाङ घर भएकी २९ वर्षीया निशाना राई छन् ।

घटनास्थलबाट प्रहरीले २ लाख ९२ हजार नगद र २० हजारको १ थान चेक बरामद गरेको छ । खालमा ११ बुक तास भेटिएको अनुसन्धानमा संलग्न एकजना अधिकृतले रातोपाटीलाई बताए । आरोपितहरुलाई प्रहरी वृत महाराजगञ्जमा राखिएको छ ।