बाबर र इफ्तिखरको शतकमा नेपाललाई विशाल लक्ष्य

काठमाडौं । एसिया कपको उद्घाटन खेलमा कप्तान बाबर आजम र इफ्तिखर अहमदको शतकमा पाकिस्तानले नेपाललाई विशाल लक्ष्य दिएको छ । 

मुल्तान स्टेडियममा टस जितेर ब्याटिङ थालेको पाकिस्तानले ५० ओभरमा ६ विकेट गुमाउँदै ३४२ रन बनाएको हो । 

पाकिस्तानका लागि बाबरले उत्कृष्ट शतकिय पारी खेले । उनले १४ चौका र ४ छक्काको मद्धतमा १५१ रन बनाए । इफ्तिखर अहमदले पनि ११ चौका र ४ छक्काको मद्धतमा १०९ रनको शतकिय पारी खेले । 

ओपनर फखार जमान र इमाम उल हक भने सस्तोमै आउट हुन पुगे । जमानले १४ र हकले ५ रन मात्रै बनाए । विकेटकिपर मोहम्मद रिजवानले ४४ रन बनाए । 

अघा अली सलमानले ५ रन जोडे ।

नेपालका लागि सोमपाल कामीले दुई विकेट लिँदा करन केसी र सन्दीप लामिछानेले एक/एक विकेट लिए । कप्तान रोहित पौडेलले इमाम र दीपेन्द्रसिंह ऐरीले रिजवानलाई उत्कृष्ट रन आउट गरे ।