कर्पोरेट ग्राहक र डेटा सुरक्षाका विषयमा प्रकाशित समाचारप्रति टेलिकमको ध्यानाकर्षण

काठमाडौं। नेपाल टेलिकमले डेटा सुरक्षाप्रति शंका व्यक्त गर्दै प्रकाशित समाचारप्रति गम्भीर ध्यानाकर्षण भएको जनाएको छ । टेलिकमले ग्राहकको गोपनीयतालाई सधैँ सम्मान गर्ने र यसको सुरक्षा र गोपनीयतामा कुनै सम्झौता नगर्ने भन्दै टेलिकमले सबै ग्राहकलाई आश्वस्त पारेको छ ।

टेलिकमले एक विज्ञप्ति जारी गर्दै राज्यका अधिकारप्राप्त निकायबाट हुने कुनै अनुसन्धानको प्रक्रियामा प्रचलित कानूनबमोजिम हुने अदालतको आदेशपछि मात्र अन्य दूरसञ्चार सेवा प्रदायकहरूले झैं विवरण उपलब्ध गराउँदै आएको जनाएको छ ।

कम्पनीका सेवाहरू अत्यन्त भरपर्दाे र सुरक्षित बनाई ग्राहकवर्गको गोपनीयता कायम गर्न टेलिकम अत्यन्त संवेदनशील रहेको जानकारी दिँदै कम्पनीले सम्पूर्ण सेवा निर्धक्क भएर प्रयोग गर्नु आग्रह गरेको छ ।साथै पछिल्लो समय कम्पनीका सेवाका संस्थागत प्रयोगकर्ताहरू उल्लेख्य रुपमा वृद्धि भइरहेको पनि कम्पनीले जानकारी दिएको छ ।