सहकारीको रकम हिनामिना गर्ने ६ जना पक्राउ

सफल खबर संवाददाता

विहीबार, १८ जेठ २०८०, १२ : ३३
सहकारीको रकम हिनामिना गर्ने ६ जना पक्राउ

काठमाडौँ । बुढानीलकण्ठ नगरपालिका–९ स्थित  एकता बुद्ध बचत तथा ऋण सहकारी संस्था लिमिटेडको ८ करोड १८ लाख ८९ हजार ७ सय ९५ रुपैयाँ हिनामिना गर्ने कार्यमा संलग्न रहेको अभियोगमा सोही संस्थाका कार्यकारी अध्यक्षसहित ६ जना पदाधिकारीहरूलाई प्रहरीले पक्राउ गरेको छ । 

 

पक्राउ पर्नेहरूमा बुढानीलकण्ठ नगरपालिका–९ बस्ने ७२ वर्षीय भानु कुमार शर्मा, ६७ वर्षीय प्रमोद कुमार न्यौपाने, ५० वर्षीय सोमलाल श्रेष्ठ, ५२ वर्षीय वीर बहादुर तामाङ, सोही नगरपालिका–८ बस्ने ३४ वर्षीय शम्भु कार्की र सोही नगरपालिका–९ बस्ने गोरखा पालुङटार नगरपालिका–७ घर भएका ५८ वर्षीय राम कुमार श्रेष्ठ रहेका छन् ।

उक्त संस्थाका बचत कर्ताहरूबाट मुद्दती तथा बचत खातामा करोडौं रुपैयाँ निक्षेप सङ्कलन गरी संस्थाका सञ्चालकहरूले व्यक्तिगत लाभका लागि प्रयोग गरी सहकारी ऐन, २०७४ विपरीतका काम गरी संस्थालाई धराशायी बनाई बचतकर्ताहरूले बचत गरेको रकम फिर्ता लिन जाँदा मुद्दती खातामा रहेको रकमको भुक्तानी मिति नाघेपछि पनि फिर्ता नगरी संस्थाले गरेको ठुलो धनराशिको अपचलनलाई ढाकछोप गर्ने गरी संस्थाका पदाधिकारीहरूले बचतकर्ताहरूलाई प्रलोभनमा पारी ठगी गरेको हुँदा आवश्यक अनुसन्धान तथा कारबाहीको लागि बागमती प्रदेश सरकार पर्यटन, उद्योग तथा सहकारी मन्त्रालय, सहकारी महाशाखाबाट पत्राचार भएपछि केन्द्रीय अनुसन्धान ब्युरो महाराजगन्जबाट खटिएको प्रहरीले उक्त रकम ठगी गर्ने कार्यमा संलग्न उनीहरूलाई काठमाडौँका विभिन्न स्थानबाट पक्राउ गरेको हो ।

 

उनीहरू उपर जिल्ला अदालत काठमाडौँबाट म्याद थप अनुमति लिई प्रहरीले आवश्यक अनुसन्धान गरिरहेको छ । 

प्रतिक्रिया दिनुहोस