जन्मकैदको फैसला सदर भएपछि रेशमले पार्टीका नेताहरूलाई बोलाए कारागार

काठमाडौँ । नागरिक उन्मुक्ति पार्टीका संस्थापक रेशम चौधरीले पार्टीका नेताहरूलाई आफूरहेको डिल्ली बजार कारागारमा बोलाएका छन्।

टिकापुर घटनाका आरोपी रेशम चौधरीसहित सातजनाविरुद्ध कैलाली जिल्ला अदालत र उच्च अदालत दिपायलले गरेको जन्मकैदको फैसला सर्वोच्च अदालतबाट पनि सदर भएको छ।सोही विषयमा छलफल गर्न बिहान १० बजे डिल्ली बजार कारागारमा बोलाएको पार्टी निकट स्रोतले जानकारी दिएको छ।

२०७२ सालमा संविधान जारी हुनुभन्दा एक महीनाअघि कैलालीको टीकापुरमा हिंसा भड्किँदा सात जना सुरक्षाकर्मी र एक नाबालक मारिएको घटनामा दोषी पाइएपछि रेशम चौधरी जेल जीवन बिताइरहेका छन्।

उनै चौधरीले सोही विषयमा छलफल गर्न आफ्नो पार्टीका नेताहरूलाई कारागार बोलाएका हुन्।भेटमा समयसामयिक राजनीतिक ‍विषयवस्तुका बारेमा पनि छलफल गरिने जनाइएको छ।