विवाह गर्न नमानेको भन्दै डाक्टरको घरमा गएर नर्सले गरिन् आत्महत्या

काठमाडौं । काठमाडौंको बोहोराटारस्थित एक डाक्टरको घरमा गएर एक नर्सले आत्महत्या गरेकी छन् । आफूलाई लामो समयसम्म प्रेममा पारेर विवाह गर्न भने अस्वीकार गरेको भन्दै २९ वर्षिया नर्स अनुमा श्रेष्ठले शनिबार आफ्ना डाक्टर प्रेमीको घरमै गएर आत्महत्या गरेकी हुन् ।

प्रहरीमा आएको जानकारी अनुसार डाक्टर प्रेमी सुजन ढकालको र नर्स अनुमा लामो समयदेखि प्रेम सम्बन्धमा थिए । तर सुजनको घरबाट अनुमासँग विवाह गर्न अस्वीकार भएको थियो ।

सोही विषयबाट सिर्जित परिस्थितिले नै सो अप्रिय घटना भएको प्रहरी वृत्त बालाजुले जनाएको छ । प्रहरीका अनुसार ३ः५२ बजे अनुमाले आत्महत्या गरिसकेको अवस्थामा ढकालका परिवारले प्रहरीमा खबर गरेका थिए।

मृतक अनुमाको परिवारको दावी अनुसार सुजन ढकाल आँफै र उनका बुबाले अनुमालाई विवाह गर्न अस्वीकार गरेका थिए । नारायणगढ घर भएकी अनुमा पेशाले नर्स र ढकाल डाक्टर भएको बताइएको छ । अनुमा वीर अस्पतालमा काम गर्ने गरेको र डाक्टर ढकाल भने कान्ति बाल अस्पतालमा काम गर्ने गरेको बुझिएको छ ।

त्यस्तै अनुमा सोह्रखुट्टेमा कोठा लिएर बस्दै आएकी थिइन् भने ढकालको घर बालाजु बोहोराटारमै हो । विवाह नै नभएको भएपनि अनुमा बेलाबेलामा ढकालकै घरमा गएर बस्ने गरेको समेत खुलेको छ । तर विवाह गर्न भने ढकाल परिवारले नमानेपछि अनुमाले आत्महत्या गरेको खुलेको हो ।

प्रहरीका अनुसार अनुमाले आत्महत्या गर्नुअघि एक एक नोटसमेत लेखेको पाइएको छ । सो नोटमा पनि प्रेम इतिहास र विवाहका लागि केटा पक्षले अस्वीकार गरेको नै उल्लेख गरिएको बताइएको छ ।

त्यस्तै ढकाल सँगकै प्रेमपछि आफूले दुई पटकसम्म गर्भपतन गराएको उल्लेख गरेकी छन् । यसको सबै कारण प्रेमी ढकालकै कारण भएको नोटमा उल्लेख गरिएको जनाइएको छ ।

अनुमाको परिवारको पक्षले अनुमाले यसअघि पनि २ पटक आत्महत्याको प्रयास गरेको बताएका छन् ।