बैतडी जिप दुर्घटना :  एकैगाउँका ६ जनाले ज्यान गुमाए

काठमाडौं । बझाङ जिप दुर्घटनामा ज्यान गुमाउनेहरु एकै गाउँका भएको खुलेको छ । गएराति जयपृथ्वी राजमार्गको खोडपे–बझाङ सडकखण्डअन्तर्गत  बैतडीको पाटन नगरपालिका–८ झौलेक मोडमा जिप दुर्घटना हुँदा छ जनाको घटनास्थलमै मृत्यु भएकामा उनीहरु एकैगाउँको भएको खुलेको हो । 

उनीहरु बझाङको केदारस्युँ गाउँपालिका–५ बाँझका स्थायी बासिन्दा हुन् । मृत्यु हुनेमा ६० वर्षीय मने बोहरा, सोही ठाउँका ४२ वर्षीय नरे बोहरा, ३५ वर्षीय गोरख बोहरा, ४५ वर्षीय मानबहादुर धामी, ४५ वर्षीय बिर्ख धामी र ४० वर्षीय वीरे धामी रहेका छन् ।

झुलाघाटबाट बझाङको बाग्थलातर्फ जाँदै गरेको से१ज ७६४ नंको जिप मङ्गलबार राति ११ बजे दुर्घटनामा परेको बैतडीका प्रहरी प्रवक्ता प्रहरी निरीक्षक योगेश खत्रीले जानकारी दिए । 
जिपमा सवार अन्य पाँच जनाले हामफालेर ज्यान जोगाएका छन् । बाह्र जना सवार जिप सडकबाट पाँच सय मिटर तल खसेको थियो ।