रामेछापमा बोलेरो दुर्घटना, एक जनाको मृत्यु, सात घाइते

रामेछाप । बोलेरो जीप दुर्घटना हुँदा रामेछापमा एक जनाको मृत्यु भएको छ भने सात जना घाइते भएका छन्।

खाँडादेवी गाउँपालिका- १ राकाथुमको बेलपोखरी डाँडा (ठुटे पिपलबोट)मा बा१६च ३८२५ नंको बोलेरो जीप दुर्घटना हुँदा एक जनाको घटनास्थलमै मृत्यु भएको हो भने सात जना घाइते भएका हुन्।

शनिबार साँझ भएको सो दुर्घटनामा मृत्यु हुनेमा खाँडादेवी- ७ का ३३ वर्षीय कर्मसिंह तामाङ रहेका प्रहरी नायब उपरीक्षक होमबहादुर पराजुलीले जानकारी दिए। उनका अनुसार सो जीप सडकबाट करिब चार सय मिटर तल खसेको थियो।

घाइतेमध्ये दुई जनाको अवस्था गम्भीर रहेको छ। जीप सुनापति गाउँपालिकाको दिमीपोखरीबाट काठमाडाैँ जाँदै गरेको थियो।

घाइतेलाई उपचारका लागि धुलिखेल अस्पताल पठाइएको छ।