ज्ञानेन्द्र शाहको अभिव्यक्ति असंवैधानिकः माधव नेपाल

काठमाडौँ । नेकपा एकीकृत समाजवादी पार्टीका अध्यक्ष माधव कुमार नेपालले पूर्वराजा ज्ञानेन्द्र शाहले प्रजातन्त्र दिवसको दिन जारी गरेको विज्ञप्ति असंवैधानिक भएको बताएका छन् । पार्टीका तर्फबाट सोमबार एक विज्ञप्ति जारी गर्दै नेपालले सो वक्तव्य लोकतान्त्रिक गणतन्त्र विरूद्धको असंबैधानिक र अनधिकृत भएको जिकिर गरेका छन् । 

‘जनताले आफ्ना प्रतिनिधिमार्फत निर्माण गरेको नेपालको संविधानद्वारा सामान्य नागरिक बनाइएका पूर्वराजा ज्ञानेन्द्र शाहले गत फागुन ७ गते ७३ औं प्रजातन्त्र दिवसको सन्दर्भमा दिएको वक्तव्यप्रति हाम्रो पार्टीको गम्भीर ध्यानाकर्षण भएको छ । यो वक्तव्य लोकतान्त्रिक गणतन्त्र विरूद्धको असंबैधानिक र अनधिकृत वक्यव्य हो’, विज्ञप्तिमा भनिएको छ । नेपालमा जनक्रान्तिद्वारा राजतन्त्रको अन्त्य गरिसकिएको र अहिले कोहीपनि “श्री ५ महाराजधिराजू नरहेको’ विज्ञप्तिमार्फत जनाइएको छ ।  

उक्त वक्तव्यमा गणतान्त्रिक व्यवस्था र राजनीतिक दलहरूप्रति लगाइएको लाल्छना आपत्तिजनक रहेको पनि विज्ञप्तिमा उल्लेख छ । ‘केही दिन अगाडि झापाबाट सुरु भएको एउटा गणतन्त्र विरोधी अभियानको उद्घाटन गरेका ज्ञानेन्द्र शाहले विगतमा राजतन्त्रले पटकपटक जनताका अधिकारमाथि धावा बोलेको प्रसङ्गलाई ढाकछोप गरेर गणतान्त्रिक व्यवस्था विरुद्द बोल्नु सरासर गलत कुरा हो’, विज्ञप्तिमा भनिएको छ, ‘यसले मुलुकको अग्रगमन र प्रगति चाहनेहरूलाई गम्भीर र चिन्तित बनाउनु स्वाभाविक छ ।’

विज्ञप्तिमा  सबै लोकतान्त्रिक गणतन्त्रवादी शक्ति र व्यक्तिहरु यसखाले गतिविधिका विरुद्ध एकजुट हुनुपर्नेमा पनि जोड दिइएको छ ।
टस्छढ एः