प्रधानमन्त्री प्रचण्डले निर्देशनात्मक सम्बोधन गर्दै

सफल खबर संवाददाता

मंगलबार, १९ पुस २०७९, ०८ : ३८
प्रधानमन्त्री प्रचण्डले निर्देशनात्मक सम्बोधन गर्दै

काठमाडौं । प्रधानमन्त्री पुष्पकमल दाहाल ‘प्रचण्ड’ ले सरकारको काम कारबाहीलाई प्रभावकारी बनाउने सम्बन्धमा मंगलबार  निर्देशनात्मक सम्बोधन गर्न लागेका छन् ।

प्रधानमन्त्रीमा नियुक्त भएपछि पहिलोपटक सोमबार सरकारको काम कारबाही प्रभावकारी बनाउन सचिवसँग छलफल गरेका प्रचण्डले प्राप्त सुझाव र समस्याहरु समेटेर निर्देशनात्मक सम्बोधन गर्न लागेका हुन् । 

पुस १० मा प्रधानमन्त्रीमा नियुक्त भएका प्रचण्डले सुशासन र नागरिकलाई सरल र सहजरुपमा सेवा प्रदान गर्ने यसअघि नै घोषणा गरेका थिए । पुस ११ मा उनले नागरिकलाई सेवा प्रदान गर्ने निकायमा भइरहेको बेथिति अन्त्य गर्ने घोषणा गरेका थिए । 

विशेषगरी राहदानी वितरण, सवारी चालक अनुमतिपत्रलगायत सेवाग्राहीको बढी भीडभाड हुने कार्यालयको कामलाई सरल र सहज बनाउने प्रधानमन्त्रीको योजनाअनुसार सोमबार पहिलो चरणमा प्रचण्डले सचिवहरूसँग छलफल गरेका थिए । केही सचिव र विभागका प्रमुखले आ–आफ्नो विभागको कार्यविवरणबारे प्रस्तुति दिन बाँकी छ । प्रधानमन्त्रीका प्रेस संयोजक सूर्यकिरण शर्माले प्रधानमन्त्री प्रचण्डले सचिवका कार्यविवरण सुनिसकेपछि मंगलवार आवश्यक निर्देशन दिने तय भएको जानकारी दिए । 

सिंहदरबारस्थित प्रधानमन्त्री तथा मन्त्रिपरिषद्को कार्यालयमा सोमबार सचिवहरुले आ–आफ्नो मन्त्रालयको वस्तुस्थितिबारे प्रधानमन्त्रीलाई ‘रिपोर्टिङ’ गरेका थिए । उनीहरूले मन्त्रालयको नीति तथा कार्यक्रम, वार्षिक बजेट र कार्यसम्पादनमा भएका कमी तथा कमजोरीका बारेमा जानकारी गराएका थिए ।

प्रतिक्रिया दिनुहोस