एलन मस्कविरुद्ध मुद्दा दर्ता

सफल खबर संवाददाता

बुधबार, २९ असार २०७९, १३ : ५५
एलन मस्कविरुद्ध मुद्दा दर्ता

काठमाडौं । विश्वका धनाढ्य एलन मस्कविरुद्ध सामाजिक सञ्जाल कम्पनी ट्वीटरले कानूनी लडाई सुरु गरेको छ ।

ट्वीटरले डेलावेयर अदालतलाई सम्झौता बमोजिम ४४ अर्ब डलरको मर्जर पूरा गर्न माग गर्दै मुद्दा दायर गरेको हो । गत शुक्रबार मस्कले ट्वीटरले नक्कली र स्प्याम खाताहरूको संख्या बारे जानकारी नदिएको भन्दै अलग्गीने घोषणा गरेपछि उनीविरुद्ध मुद्दा दायर भएको हो । साथै मस्कलाई ५४ दशमलव २० डलरको हिसाबले प्रतिशेयर सम्झौता पूरा गर्न आदेश दिन माग गरेको छ ।

व्यक्तिगत स्वार्थ पूरा गर्न नसकेका कारण मस्कले सम्झौताबाट पछि हटेको भन्दै सम्झौताको नियम उल्लघंन गरेको आरोप लगाइएको अन्तर्राष्ट्रिय सञ्चारमाध्यमले जनाएका छन् । ट्वीटर कम्पनीका अध्यक्ष ब्रेट टेलरले आफ्नो दायित्वप्रति मस्क जिम्मेवार हुनुपर्ने बताएका छन् ।

ट्वीटर सम्झौता भएपछि टेस्ला कम्पनीको शेयरका साथै शेयर बजारमा गिरावट आएको रिटमा आरोप लगाइएको छ । मस्कको सम्पत्ति २०२१ को नोभेम्बरमा १ सय बिलियन डलरको गिरावट आएका कारण यो सम्झौताबाट उनीपछि हट्न खोजेको जनाइएको छ ।

प्रतिक्रिया दिनुहोस