ट्रम्पसँगको खटपटपछि एलन मस्कले गरे नयाँ राजनीतिक दल गठनको घोषणा

एजेन्सी । अमेरिकन अर्बपति तथा प्रविधि व्यवसायी एलन मस्कले राष्ट्रपति डोनाल्ड ट्रम्पसँगको गहिरो मतभेदपछि नयाँ राजनीतिक दल गठन गर्ने घोषणा गरेका छन् । 

शनिबार सामाजिक सञ्जाल एक्समा लेख्दै मस्कले ‘अमेरिका पार्टी’को औपचारिक घोषणा गरेका हुन् ।

‘जब देश भ्रष्टाचार र खर्चकै कारण दिवालिया हुँदैछ, त्यहाँ हामी बहुदलीय प्रजातन्त्रमा होइन, एकदलीय व्यवस्थामा बाँचिरहेका छौं’, मस्कले लेखेका छन्, ‘आज ‘अमेरिका पार्टी’ गठन गरिएको छ- तिमीलाई फेरि स्वतन्त्रता दिन ।’

यो घोषणासँगै मस्कले ट्रम्पको ‘बिग ब्यूटिफुल बिल’ नामक घरेलु नीतिगत विधेयकप्रति आफ्नो गम्भीर असहमति दोहोर्‍याएका छन् । सो विधेयकले संघीय बजेट घाटामा खरबौं डलर थप्ने आँकलन गरिएको छ । यही विषयमा मतभेद भएपछि गत महिनाबाट उनीहरूबीच सम्बन्ध चिसिएको थियो ।

हालसम्म संघीय निर्वाचन आयोगमा मस्कले कुनै नयाँ दल दर्ता गराएको प्रमाण देखिएको छैन । तर, मस्कले आफ्नो पार्टीले वित्तीय पारदर्शिता, खर्च नियन्त्रण र करदाताको हितमा काम गर्ने बताएका छन् । उनले भनेका छन्, ‘हामी ऋणको दासत्व अन्त्य गर्न चाहन्छौं ।’

यद्यपि मस्क र ट्रम्पबीच सामाजिक मुद्दामा धेरै हदसम्म मिल्दोजुल्दो विचार भए पनि, आर्थिक नीतिको विषयमा उनीहरू अलगअलग देखिएका छन् । मस्कले रिपब्लिकनहरूको खर्च नीतिलाई आलोचना गर्दै आएका छन् ।

अमेरिकामा विगतमा पनि तेस्रो राजनीतिक दल गठनका प्रयास भएका थिए, तर खासै सफल हुन सकेका छैनन् । सन् १९९२ मा अर्बपति रोस पेरोटले स्वतन्त्र उम्मेदवारका रूपमा राष्ट्रपतीय निर्वाचनमा लगभग १९ प्रतिशत मत ल्याए पनि कुनै राज्य जित्न सकेनन् ।

राजनीतिक विश्लेषकहरू भन्छन्- नयाँ दल गठन गर्नु कानूनी, वित्तीय र संरचनागत रूपमा निकै चुनौतीपूर्ण कार्य हो । मतदाता र उम्मेदवार स्थापित दलभन्दा बाहिर जान हिच्किचाउने प्रवृत्ति देखिन्छ ।

मस्कले भने आगामी वर्षको मिडटर्म निर्वाचनमा सक्रिय रूपमा सहभागी हुने र प्रारम्भमा केही मात्र कङ्ग्रेस तथा सिनेट सिटमा उम्मेदवारहरूलाई समर्थन गर्ने योजना बनाएको जनाएका छन् ।

यसैबीच, राष्ट्रपति ट्रम्पले पनि मस्कप्रति कटाक्ष गरेका छन् । उनले मस्कका कम्पनीहरूसँग रहेको सरकारी ठेक्का पुनः विचार गर्ने चेतावनी दिएका छन् । 

ट्रम्पले मस्कले नेतृत्व गरेको ‘सरकारी कार्यदक्षता विभाग’लाई ‘राक्षस’ जस्तो भन्दै व्यंग्य गरेका छन् । 

यो नयाँ राजनीतिक ध्रुवीकरणले अमेरिकी राजनीतिमा नयाँ तरंग ल्याउने देखिएको छ । तर, यसको सफलताको लागि मस्कले कति दूरसम्म तयारी गरेका छन् भन्ने अझै स्पष्ट भएको छैन ।