जनार्दन शर्मा अर्थमन्त्री रहुन्जेल नफर्किने भन्दै अनिश्चितकालका लागि बिदामा बसे अर्थसचिव मरासिनी

काठमाडौँ । अर्थमन्त्री जनार्दन शर्मा माथि राजिनामाको दबाब चौतर्फी बढिरहदा मन्त्रालयका सचिव भने अनिश्चितकालका लागि बिदामा बस्न लागेका छन् । बजेट निर्माण र विभिन्न विषयमा अर्थमन्त्री शर्मा विवादमा मुछिएपछि सचिव मधुकुमार मरासिनी बिदामा बसेका हुन् ।

बुधबार बिहान मरासिनीले प्रधानमन्त्री शेरबहादुर देउवा, अर्थमन्त्री जनार्दन शर्मा र मुख्यसचिव शंकरदास वैरागीलाई भेटेर बिदामा बस्ने जानकारी दिएको बालुवाटार स्रोतले बताएको छ । जनार्दन शर्मा मन्त्री रहुन्जेल आफू मन्त्रालय नफर्किने पनि प्रधानमन्त्री देउवालाई मरासिनीले जनाकारी गराएको स्रोतको भनाइ छ ।

अर्थमन्त्री शर्मामाथि बजेट घोषणाको अघिल्लो रात अनधिकृत व्यक्तिलाई प्रवेश गराएर करका दर हेरफेर गरेको आरोप लागेको छ । साथै अनधिकृत व्यक्ति प्रवेश गरेको प्रमाणका रूपमा रहेको सीसीटीभी फुटेज अर्थ मन्त्रालयका उच्च अधिकारीकै मिलेमतोमा ‘डिलिट’ गराइएको पनि उनीमाथि आरोप लागेको छ ।