मकवानपुरमा शान्तिपूर्ण मतदान, ६५ प्रतिशत मत खस्यो

काठमाडौं । मकवानपुर जिल्लामा मतदान सकिएको छ । जिल्लामा रहेको १० वटै स्थानीय तहमा शान्तिपूर्ण मतदान सम्पन्न भएको छ ।

बिहान सात बजे शुरु भएको १० वटै पालिकाको मतदान सकिएको र मतपेटीका संकलन कार्य शुरु भएको मकवानपुरका सहायक निर्वाचन अधिकृत सागर शर्माले जानकारी दिए ।

जिल्लामा दुई लाख ९४ हजार ९१९ मतदाता रहेका थिए । त्यसमध्ये प्रारम्भिक अनुमान अनुसार करिब ६५ प्रतिशत मतदान भएको उनले बताए । यद्यपी यकिन तथ्याङ्क भने आउन बाँकी नै रहेको शर्माले बताए ।

हेटौंडा उपमहानगरपालिकाको मतपेटिका संकलन भइरहेको र पानी परेका कारण केही ढिलाई भएकाले सर्वदलीय बैठकमा सहमति जुटेमा मत गणना भोलीबाट मात्रै हुने शर्माले बताए ।

यद्यपी सर्वदलीय बैठकको निर्णय अनुसार आज नै मतगणना शुरु हुन पनि सक्ने उनले बताए ।

स्थानीय तह निर्वाचनको लागि मकवानपुरमा ३ हजार २ सय जना सुरक्षाकर्मी परिचालन भएको थियो । १ हजार ४ सय ७३ जना म्यादी प्रहरी, ५ सय जना नेपाली सेना, ४ सय सशस्त्र प्रहरी र ९ सय जना नेपाल प्रहरी खटाइएको थियो ।