प्रत्यक्ष मतदानमा समानुपातिकभन्दा बढी मत बदर, कुल प्रतिशत घट्यो

काठमाडौँ । प्रतिनिधि सभा निर्वाचनको मत बदर प्रतिशत पछिल्ला पाँच निर्वाचनको तुलनामा घटेको छ।

निर्वाचन आयोगका अनुसार यस पटक प्रत्यक्ष र समानुपातिक मतदान मिलाएर औसत ४.७ प्रतिशत मत बदर भएको आयोगको तथ्यांक छ। अघिल्लो निर्वाचन २०७९ सालमा यो प्रतिशत ५.०५ थियो भने २०७४ सालको निर्वाचनमा सबैभन्दा बढी ५.१८ प्रतिशत मत बदर भएको थियो।

निर्वाचन आयोगका अनुसार प्रत्यक्षतर्फ मत बदर समानुपातिकभन्दा बढी देखिएको छ। प्रत्यक्ष मतदानमा ६ लाख ९ हजार १५ मत बदर भएका छन्, जुन ५.४५ प्रतिशत हो। समानुपातिकतर्फ भने ४ लाख ४५ हजार ५९२ मत बदर भएका थिए, जसको प्रतिशत ३.९५ रहेको छ।

समानुपातिकतर्फ १ करोड १२ लाख ८० हजार ६१७ र प्रत्यक्षतर्फ १ करोड ११ लाख ६८ हजार ३२ मतदाता मतदानमा सहभागी भएका थिए। यस निर्वाचनमा कुल मतदाता संख्या १ करोड ८९ लाख ३ हजार ६८९ रहेको आयोगले जनाएको छ।