मतदान सकिएको एक घण्टापछि मतगणना सुरु गर्ने निर्वाचन आयोगको तयारी

सफल खबर संवाददाता

शुक्रबार, ३० बैशाख २०७९, ११ : ०६
मतदान सकिएको एक घण्टापछि मतगणना सुरु गर्ने निर्वाचन आयोगको तयारी

काठमाडौं । निर्वाचन आयोगले मतदान सकिएलगत्तै मतगणना सुरु गर्ने बताएको छ । आयोगले मतदान सकिएको एक घण्टापछि मतगणना सुरु गर्ने गरी तयारी भइरहेको जनाएको छ ।

प्रमुख आयुक्त दिनेशकुमार थपलियाले साँझ ८ बजेसम्म स्थानीय तहको चुनावको अनुभूति हुने गरी कम्तीमा २० प्रतिशत मतगणना सक्ने तयारी गरेको बताए ।

थपलियाले ५ दिनभित्र मतगणना सक्ने गरी तयारी भएको पनि बताए । गत चुनावमा काठमाडौं महानगरको मतगणना सकिन १७ दिन लागेको थियो । थपलियाले एउटा वडाको मतगणना करिब १८ घण्टामा सक्नेगरी तयारी भएको र त्यसैअनुसार ५ दिनमा मतगणना सक्ने तयारी भएको बताए ।