टक्सार पिखुवाखोला हाइड्रोपावरले ४७ करोड ५२ लाख रुपियाँको आईपीओ निष्काशन गर्ने

काठमाडौँ । टक्सार पिखुवाखोला हाइड्रोपावर लिमिटेडले ४७ करोड ५२ लाख रुपियाँ बराबरको ४७ लाख ५२ हजार कित्ता साधारण शेयर (आईपीओ) निष्काशन गर्ने भएको छ । 

कम्पनीले जारी पूँजीको ४४ प्रतिशत बराबरले हुन आउने रु. ४७ करोड ५२ लाख रकम बराबरको ४७ लाख ५२ हजार कित्ता साधारण शेयर आयोजना प्रभावित, सर्वसाधारण, कर्मचारी तथा सामुहिक लगानी कोषका लागि निष्काशन गर्न लागेको हो । यसैक्रममा आईपीओ निष्काशन गर्ने कार्यका लागि प्रभु क्यापिटल लिमिटेडलाई शेयर निष्काशन तथा बिक्री प्रबन्धकमा नियुक्त गरेको छ । सो नियुक्ति सम्बन्धी सम्झौता आइतबार सम्पन्न भएको हो । 

सम्झौतामा टक्सार पिखुवाखोला हाइड्रोपावर लिमिटेडको तर्फबाट कम्पनीका प्रबन्ध निर्देशक  नरेन्द्र बल्लभ पन्त  तथा प्रभु क्यापिटल लिमिटेडका तर्फबाट प्रबन्ध निर्देशक दिनेश थकालीले हस्ताक्षर गरेका छन् । कम्पनीले भोजपुर जिल्लाको भोजपुर नगरपालिकामा अवस्थित पिखुवा खोलामा टक्सार पिखुवाखोला जलविद्युत आयोजना निर्माण गरिरहेको छ । ८ मेगावाट क्षमताको आयोजना निर्माण गरेको कम्पनीले आयोजनाको निर्माण कार्य सम्पन्न गरी मिति २०७८ साल बैशाख १ गतेदेखि नै विद्युतको व्यापारिक उत्पादन गरि नेपाल विद्युत प्राधिकरणलाई विद्युत बिक्री गरिरहेकोे छ ।