कस्तो रहला आजको मौसम ?

काठमाडौँ । जल तथा मौसम पूर्वानुमान महाशाखाले सोमबार देशका अधिकांश स्थानको मौसम  आंशिकदेखि सामान्य बदली हुने  जनाएको छ ।पश्चिमी न्युन चापीय प्रणालीको सामान्य प्रभाव रहेकाले बदली हुने भएको हो ।

हाल प्रदेश १, बागमती प्रदेश र गण्डकी प्रदेशमा आंशिकदेखि सामान्य बदली रहेको छ । अन्य प्रदेशका पहाडी भू–भागमा मौसम सामान्यतया सफा रहेको छ। तराईका धेरै स्थानमा हुस्सु–कुहिरो लागेको छ ।

सोमबार दिउँसो सुदूरपश्चिम प्रदेश, कर्णाली प्रदेश, लुम्बिनी प्रदेश, गण्डकी प्रदेश र बागमती प्रदेशमा आंशिकदेखि सामान्य बदली रही बाँकी प्रदेशमा आंशिक बदलीदेखि मौसम सामान्यतया सफा रहने छ। सुदूरपश्चिम प्रदेश र कर्णाली प्रदेशका उच्च पहाडी तथा हिमाली भूभागका एक–दुई स्थानमा हल्का हिमापातको सम्भावना छ ।

यसैगरी राति पहाडी भू–भागमा आंशिकदेखि सामान्य बदली रही बाँही क्षेत्रमा आंशिक बदली रहने छ। देशका उच्च पहाडी तथा हिमाली भू–भागका थोरै स्थानमा हल्का हिमपातको संभावना छ।