माधव नेपालतर्फ ओलीको कटाक्ष– हाम्रो घरका बिरालाहरू देउवाको भान्सामा पुगे

सफल खबर संवाददाता

शनिबार, १९ भदौ २०७८, १६ : ३२
माधव नेपालतर्फ ओलीको कटाक्ष– हाम्रो घरका बिरालाहरू देउवाको भान्सामा पुगे

काठमाडौँ । नेकपा एमालेका अध्यक्ष केपी शर्मा ओलीले माधव नेपालप्रति कटाक्ष गर्दै शेरबहादुर देउवाको भान्सामा पुगेको बताएका छन् । पार्टी फुटाएर नयाँ पार्टी बनाएका माधव नेपाल पक्षप्रति कटाक्ष गर्दै  शनिवार काठमाडौँमा भएको पार्टीको कार्यक्रममा माधव नेपालले नेकपा एस पार्टी बनाएको नभई काँग्रेस र देउवाका लागि ‘यस’ पार्टी बनाएको भन्दै व्यङ्ग्य गरे । 

CG Developers Tansen Cement box

उनले एमाले छोडेर अहिलेको सरकारमा जान तयार गरिरहेकाहरुलाई देउवाको भान्छामा दूध भात खान गएका बिरालाहरूको संज्ञा दिए । उनले भने– ‘अहिले हाम्रो घरका बिरालाहरू शेरबहादुर देउवाको भान्सामा पुगेका छन् । दूध र भात खान पाइन्छ भन्दै म्याउ गर्दै ढुक्नलाई पुगेका छन् ।’ 

ओलीले सत्तारुढ गठबन्धनलाई मिलेर आएमात्र चुनावमा जमानत जोगिने बताएका छन् ।  उनले एमालेसँग एक्लाएक्लै चुनाव लड्ने आँट नरहेको दाबी गरेका छन् । एमाले काठमाडौं महानगर कमिटीको भेलालाई शनिबार सम्बोधन गर्दै ओलीले उनीहरु सबै मिलेर आएमात्रै जमानत जोगिने बताए।

‘एक्लाएक्लै आयौ भने जमानत जफत हुन्छ, त्यसैले म भन्छु एमालेसँग चुनाव लड्न एक्लै आउने आँट नगर्नू,’ ओलीले भने, ‘मिलेर आउनु, जमानत जोगिन्छ ।’ ओलीले एमालेले एक्लै चुनाव लड्न सक्ने र जित्न सक्ने समेत दाबी गरे। ‘यो पार्टीले एक्लै चुनाव लड्न सक्छ, एक्लै चुनाव जित्न सक्छ । गठबन्धन बनाएर झ्यालबाट मच्छर पसेजस्तो बस्ने बाटो पनि आउँदो चुनावबाट बन्द गरिदिन्छौं ।’