तालिबानका नेता बरादरले सरकारको नेतृत्व गर्ने !

काबुल । अफगानिस्तानमा तालिबानले छिटै अफगान सरकारको घोषणा गर्न सक्ने जनाइएको छ । तालिबानले तालिबानका सहसंस्थापक मुल्ला बरादरको नेतृत्वमा सरकार बनाउन सक्ने रोयर्टसलाई उदृत गर्दै बीबीसीले जनाएको छ । तालिबान निकट स्रोतले नयाँ सरकारबारे जानकारी दिएको रोयटर्सले जनाएको छ ।

रोयटर्सका अनुसार मुल्ला बरादर, तालिबान राजनीतिक कार्यालयका उपप्रमुख शेर मोहम्मद अब्बास स्तनिकजई, तालिबानका संस्थापक मुल्ला उमरका छोरा मुल्ला मोहम्मद याकूबले अफगान सरकारमा महत्वपूर्ण भूमिका पाउने बताएको छ ।

गत अगस्ट १५ मा तालिबानले काबुलमा कब्जामा लिए पनि हालसम्म नयाँ सरकार बनाएको छैन । ३१ अगस्टमा अमेरिकी सेना पूर्णरुपमा फर्किएपछि तालिबानले सरकार बनाउने तयारी तिब्र पारेको छ । काबुलस्थित राष्ट्रपति भवनमा भव्य समारोहको तयारी भइरहेको जनाइएको छ ।