गगन थापासहित कांग्रेसका १० नेताले भने– समायोजनका नाममा पार्टी कब्जा गर्ने षड्यन्त्र

काठमाडौं । विधिविपरीत सदस्यता बाँडिएको आरोप लगाउँदै कांग्रेसको १० नेताले खबरदारी गरेका छन् । यसलाई समायोजनाको नाममा पार्टी कव्जा गर्ने षडयन्त्र भएको उनीहरुले दावी गरेका छन् । विधि विपरीत बाँडिएका सदस्यताले पार्टीको मर्ममाथि प्रहार हुने उनीहरुले बताए । 

केन्द्रीय सदस्यहरु डा चन्द्र भण्डारी, धनराज गरुङ, कमला पन्त, रत्ना शेरचन, गगन थापा, बद्री पाण्डे, गुरुराज घिमिरे, सरिता प्रसाईं, रामकृष्ण यादव र किरण यादवले संयुक्त वक्तव्य जारी गर्दै कांग्रेसका निष्ठावान कार्यकर्ताको आत्मसम्मानमा चोट परेको बताएका छन् । 

‘समायोजनका नाममा पार्टी संरचना कब्जा गर्ने उद्देश्यले निर्धारित प्रक्रिया बाहिरबाट वितरण गरिएका क्रियाशील सदस्यताले पार्टीको मर्ममाथि नैं प्रहार गरेको छ र आफ्नो सर्वस्व सुम्पेका साथीहरूको आत्मसम्मानमा प्रहार गरेको छ । यसलाई तुरुन्त रोक्नु पर्दछ’, वक्तव्यमा भनिएको छ ।