एमाले विवाद : ओलीले केन्द्रीय कमिटी बैठक बोलाएपछि दुबै पक्षका नेताहरु छलफलमा

काठमाडौं । आज बालुवाटारमा बसेको नेकपा एमालेको बैठकले यही असार १८ गते केन्द्रीय कमिटी बैठक बोलाएपछि दुवै पक्षका नेताहरू यतिबेला छलफलमा जुटेका छन् ।

ललितपुरस्थित समिट होटलमा संस्थापन पक्षबाट उपमहासचिव विष्णु पौडेल,नेता सुवास नेम्वाङ र शंकर पोखरेल वार्तामा सहभागी छन् । माधव नेपाल पक्षबाट उपमहासचिव घनश्याम भुसाल, सचिवहरू भीम आचार्य, गोकर्ण विष्ट र स्थायी कमिटी सदस्य सुरेन्द्र पाण्डे छन् । नेकपा एमालेको केन्द्रीय कमिटी बैठकमा माधव नेपाल पक्षलाई पनि सहभागी गराएर पार्टी एकता कायम गर्न दोस्रो तहका नेताहरु छलफलमा जुटेका हुन् । 

यसअघि पनि एकता वार्ताको लागि निरन्तर छलफलमा रहेका नेताहरू दशौं राष्ट्रिय महाधिवेशन आयोजक कमिटी भंग भएपछि पुनः वार्तामा बसेका हुन् । माधव पक्षका केही नेताहरु २०७५ जेठ २ मा ओली नफर्केका हुनाले झुक्याउन सक्ने आशंका गरेका छन् । नेपाल पक्ष पनि बैठकमा सहभागिता जनाउने वा नजनाउनेबारे आन्तरिक छलफलमा छ ।

नेपाल पक्षकै कतिपय नेताले भने फेरि पनि जालझेल गर्न खोजिएको र जेठ २ अघिको बैठक बसेर अरुलाई थप्नुपर्नेमा ओलीले एकलौटी गरेको हुनाले बैठकमा सहभागी नहुने बताइरहेका छन् ।