बारामा यात्रुवाहक बस पल्टिँदा ११ जना घाइते, एकको अवस्था गम्भीर

काठमाडौँ । जिल्ला बारा जितपुरसिमरा उपमहानगरपालिका १० नितनपुर चोकस्थित वीरगञ्ज–पथलैया सडक खण्डमा यात्रुवाहक बस दुर्घटना हुँदा ११ जना घाइते भएका छन्। घाइतेमध्ये एक जनाको अवस्था गम्भीर रहेको छ।

शनिबार बिहान करिब ११ बजे वीरगञ्जबाट सप्तरीतर्फ जाँदै गरेको ना ७ ख २३५ नम्बरको बस ओभरटेक गर्ने क्रममा अनियन्त्रित भई सडकमै पल्टिँदा दुर्घटना भएको हो।

दुर्घटनामा सप्तरी तिलाठी कोइलाडी गाउँपालिका–१ बस्ने ४२ वर्षीय कमलेश यादव, उनकी श्रीमती ३४ वर्षीया रुबी यादव र १५ वर्षीया छोरी शिवानी यादव, पर्सा वीरगञ्ज महानगरपालिका–१३ बस्ने ६४ वर्षीय रामनरेश प्रसाद, सप्तरी कञ्चनरुप नगरपालिका–१ बस्ने ४७ वर्षीय सहचालक नरेश पंजियार, पर्सा पकाहा मैनपुर गाउँपालिका–५ बस्ने २८ वर्षीय धनञ्जय प्रसाद चौरसिया, पर्सा बहुदरमाई नगरपालिका–२ बस्ने ३४ वर्षीया सुनिता यादव, सिराहा कर्जन्हा नगरपालिका–११ बस्ने ६२ वर्षीय चिनीलाल श्रेष्ठ, बारा जितपुरसिमरा उपमहानगरपालिका–३ बस्ने ४० वर्षीय चन्द्र तामाङ, रौतहट चन्द्रपुर नगरपालिका–६ बस्ने ४५ वर्षीया दिपा घिमिरे तथा ठेगाना नखुलेका अन्दाजी ४० वर्षीय अमित कुमार गुप्ता घाइते भएका छन् ।

घाइतेहरूको नेशनल मेडिकल कलेज वीरगञ्ज, तराई अस्पताल वीरगञ्ज तथा अन्य स्थानीय मेडिकलमा उपचार भइरहेको छ ।

बस चालक फरार रहेकाले खोजी भइ रहेको र दुर्घटनाबारे थप अनुसन्धान जारी छ ।