‘नेकपा’ भंग गर्ने सर्वोच्चको फैसलाविरुद्ध पुनरावलोकनमा जाने माओवादी केन्द्रको निर्णय

काठमाडौं । नेकपा माओवादी केन्द्रको स्थायी कमिटिले ‘नेकपा’ विवादमा सर्वोच्च अदालतको फैसला पुनरावलोकनमा जाने निर्णय गरेको छ ।

सिंहदरबारस्थित संसदीय दलको कार्यालयमा बसेको स्थायी कमिटी बैठकमा कानुनविद् रामनारायण बिडारी, सम्भू थापा, मुक्ति प्रधानलगायत कानुनविद्सँग परामर्श गरेपछि पुनरावलोकनमा जाने निर्णय गरेको हो ।

सर्वोच्चको फैसला पुनरावलोकनमा जाँदा उपयुक्त हुने बैठकमा कानुनविदले सुझाव दिएका थिए ।  नेकपा नाम विवादमा सर्वोच्चले गरेको फैसलामा मागदाबी भन्दा बढी, कतैबाट निर्देशित भएको आभास हुने भएकाले पुनरावलोकनमा जान सकिने उनीहरुको तर्क थियो ।

सर्वोच्चले गत फागुन २३ गते नेकपा एकता भंगको फैसला गरेको थियो। उक्त फैसला राजनीतिक भएको भन्दै माओवादीका अध्यक्ष पुष्पकमल दाहाल ‘प्रचण्ड’ले फैसलाको पुनरावलोकनमा जानसमिने प्रतिक्रिया व्यक्त गर्दै आएका थिए ।