काठमाडौं । कामचलाउ हैसियतमा रहेको खड्ग ओलीको सरकारले राज्य संयन्त्रलाई कमजोर बनाउने, आफ्नो स्वार्थपूर्ति गर्ने काइते योजना अगाडि सारेको छ । पछिल्लो पटक नेपालको ऊर्जा तथा विद्युत क्षेत्रमा सकारात्मक प्रभाव र हस्तक्षेपका साथ काम गरेका कुलमान घिसिङलाई पुनः नियुक्ति गर्न अटेर गरेको कामचलाउ सरकारले हितेन्द्रदेव शाक्यलाई कानुन विपरीत नियुक्त गरेको छ ।
नेपाल विद्युत प्राधिकरण आफैमा झण्डै डेढ खर्बभन्दा बढी बजेट भएको संस्था हो । यो संस्थालाई आफूखुसी चलाउने ध्येयका साथ कामचलाउ सरकारले कानून मिचेर शाक्यलाई कार्यकारी निर्देशक बनाएको छ । कामचलाउ सरकारले दीर्घकालीन महत्वका निर्णय गर्न नपाउने भएपनि नियमित सरकारले जसरी काम गरिरहेकामा प्रशासनविद तथा कानूनका जानकारले आपत्ति जनाएका छन् । तर भैँसीलाई बाँसुरी बजाएजस्तो ओली सरकार कोही कसैको पनि आलोचना तथा सुझावलाई मान्ने अवस्थामा छैन ।
कामचलाउ सरकारले जनतामाथि महंगीको भार थोपर्ने गरी पेट्रोलियम पदार्थको मूल्यवृद्धि गर्ने तयारी गरेको छ । मासिक डेढ अर्ब घाटा भएको काइते विवरण देखाएर नेपाली जनताको ढाड भाँच्ने षडयन्त्रमा कामचलाउ सरकार लागेको छ । ५० रुपैयाँमा किनेको पेट्रोलियम पदार्थमा कर मात्रै ६० रुपैयाँभन्दा बढी छ ।
जनतालाई राहत दिन त कहाँ हो कहाँ, जसरी भएपनि मूल्यवृद्धि गर्ने योजनामा ओली र उनको कारिन्दाका रुपमा रहेका उद्योग वाणिज्य तथा आपूर्ति मनत्री लेखराज भट्ट न्वारनदेखिको बल लगाएर लागिपरेका छन् । पेट्रोलियम पदार्थको मूल्य बढ्दा त्यसको अन्य क्षेत्रमा समेत दीर्घकालीन असर पर्छ । निगमबाट निर्वाचन खर्च जुटाउने अभिप्रायले मूल्यवृद्धि गर्न लागिएको जानकारहरुको भनाइ छ ।
नेपाल टेलिकमको साधन र स्रोतको दुरुपयोग
नेपाल टेलिकमलाई समेत धरासायी बनाउने ध्येयका साथ प्रधानमन्त्री ओलीले पार्वत गुरुङलाई परिचालन गरेका छन् । टेलिकमका कुनै पनि प्रस्ताव अगाडि बढाउन नदिएका ओलीले निजी क्षेत्रका अन्य सेवाप्रदायकको हितमा भने धमाधम निर्णय गर्ने गरी मार्गप्रशस्त गरिदिएका छन् ।
आजकल देशव्यापी रुपमा ओलीको पक्षमा भरहेको पञ्च¥यालीका लागि नेपाल टेलिकमको साधन र स्रोतको दुरुपयोग गरिएको छ । त्यसो त प्रधानमन्त्री निवासमा आयोजना गरिएका अधिकांश गुट भेलामा समेत राज्यको साधन र स्रोतको चरम दुरुपयोग गरिएको छ । नेपाली सेनाको हेलिकोप्टरको दुरुपयोग पनि उस्तै बढेको छ । घण्टाको नै एक लाख ५० हजार रुपैया भाडा पर्ने हेलिकोप्टरमा ओली गुटका कार्यकर्ता बोकिएको छ ।
प्रहरी प्रशासनको रासन भत्तामा समेत ओलीको गिरोहले आखा लगाएको छ । नेपाल प्रहरी र सशस्त्र प्रहरीको खानपानमा समेत आँखा लगाएको ओली गुटले निर्वाचनको नाम दिएर देशव्यापी रुपमा नै लुटपाट गरिरहेको छ ।
कामको नाममा वरको सिन्को पर नसार्ने ओली गुटले जसरी भएपनि पैसा जम्मा पार्ने र राज्यकोषमा दोहन गर्ने रणनीति अनुसार नै काम गरिरहेको जानकारहरुको भनाइ छ । राज्यकोषमाथि भइरहेको दोहन रोक्न बेलैमा ध्यान दिनुपर्ने आवाज उठेको छ । त्यसकारण नेकपाको आधिकारिक धार, नेपाली काँग्रेस र जनता समाजवादी पार्टीले तत्काल पहलकदमी लिनु आवश्यक भएको जानकारहरुको भनाइ छ ।
ओली गुटलाई त्यत्तिकै छाड्ने हो भने राज्यका निकायकाहरु क्रमशः धारासायी बन्ने छन् । ओली गुटलाई त आए आँप, गए झटारो भने जस्तै भएकाले तत्काल राज्यकोषमाथि भएको लुटमाथि नियन्त्रण गर्नु जरुरी र अत्यावश्यक देखिन्छ । अन्यथा नेपाली जनताको सेवाका लागि स्थापना भएका सरकारी संस्थान इतिहास बन्ने कुरामा कुनै दुईमत रहँदैन ।
प्रतिक्रिया दिनुहोस
सफल खबर संवाददाता
मंगलबार, ०४ फागुन २०७७, १७ : ०२
लेखकबाट थप
सम्बन्धित समाचारहरु
विद्युत प्राधिकरणले काट्यो थप दुई ठुला उद्योगको बिजुली
बक्यौता महसुल उठाउन लाइन काट्दै विद्युत प्राधिकरण
विद्युत प्राधिकरणलाई बाह्रबिसे सबस्टेसनको तत्काल निर्माण सक्नु पर्ने दबाब
विद्युत प्राधिकरणका पूर्व मेकानिकल इन्जिनियरविरुद्ध भ्रष्टाचारको मुद्दा
विद्युत प्राधिकरणले थाल्यो चालु खर्चहरुमा कटौती