प्रधानमन्त्री ओली प्रशंसाको भोको रहेका छन्, कसैले आलोचना गर्ने बित्तिकै आक्रोशित हुन्छन् : माधव नेपाल

काठमाडौं । नेकपा प्रचण्ड–नेपाल पक्षका अध्यक्ष माधव कुमार नेपालले प्रधानमन्त्री केपी शर्मा ओली प्रशंसाको भोको रहेको र कसैले आलोचना गर्ने बित्तिकै उनी आक्रोशित हुने गरेको बताएका छन् । शनिबार मिडिया एलाइन्ससँगको अन्तरक्रिया कार्यक्रममा उनले आफूहरुले ओलीको आलोचना गरेको नभइ प्रतिगामी कदम र प्रवृत्तिको विरोध गरेको बताए ।

प्रजातन्त्र र लोकतन्त्र नै खतरामा पर्ने अवस्था आएपछि आफूहरुले त्यसको रक्षाका लागि अग्रसरता लिएको पनि नेपालले बताए । ‘हामी संविधानको पक्षमा छौं । ओलीको कदमविरुद्ध अरु पार्टीसँग सहकार्यका लागि जरुरी छ र प्रयास जारी छ’, नेपालले ओलीको कदमविरुद्ध संयुक्त आन्दोलनमा जोड दिँदै भने, ‘अधिनायकवादविरुद्ध हामी हातेमालो गर्दै आन्दोलनमा जान चाहन्छौं । तपाईँहरु मिडियाको भूमिका पनि महत्वपूर्ण छ ।’

आफूहरु सबै किसिमका निरंकुशताको विरुद्ध रहेको बताउँदै नेपालले आत्मप्रशंसामा रमाउने बानीले ओलीलाई बिगार्दै लगेको पनि बताए । पार्टीमा रहाल कायम रहेको ४३३ मध्ये २८८ जना केन्द्रीय आफूहरुको पक्षमा रहेको भन्दै आधिकारिक पार्टी आफूहरु रहेको नेपालले बताए । उनले कुनै पनि हालतमा प्रतिनिधिसभा पुनःस्थापना हुनुपर्ने भन्दै संविधानले प्रधानमन्त्रीलाई विघटनको अधिकार नै नरहेको दोहोर्याए ।