प्रधानमन्त्रीको कार्यक्रममा पत्रकारलाई प्रवेश निषेध

सफल खबर संवाददाता

शनिबार, १७ माघ २०७७, १३ : १८
प्रधानमन्त्रीको कार्यक्रममा पत्रकारलाई प्रवेश निषेध

चितवन । भरतपुरमा निर्माण हुन लागेको सिटी हलको शिलान्यास कार्यक्रममा पत्रकारलाई प्रवेश निषेध गरिएको छ । सिटी हलको शिलान्यास प्रधानमन्त्री केपी शर्मा ओलीबाट गर्न लागिएको हो ।

सिटी हल निर्माणस्थलमा समाचार संकलनका लागि गएका १२ जना जति पत्रकारलाई गेटमा बसेका सुरक्षाकर्मीले भित्र प्रवेश गर्न नदिई फिर्ता पठाएको नेपाल पत्रकार महासंघ चितवन शाखा कार्य समिति सदस्य प्रकाश सिग्देलले जानकारी दिए ।

प्रधानमन्त्रीको कार्यक्रममा प्रवेश नपाएपछि फर्किएका पत्रकारहरुले पत्रकारलाई समाचार संकलनमा रोक लगाउनु ओली सरकारको निरंकुशताको पराकाष्ठा भएको प्रतिक्रिया दिएका छन् ।