प्रधानन्यायाधीशले समय दिन आनाकानी गरेपछि सवालजबाफ

काठमाडौं । प्रतिनिधिसभा विघटनविरुद्ध सर्वोच्च अदालतमा दायर भएको रिटमध्ये अहिले संवैधानिक इजलासमा नेकपा नेता देव प्रसाद गुरुङले दायर  गरेको रिट निवेदनमाथि सुनुवाइ भइरहेको छ । बहसका पूर्व महान्यायाधीवक्ता  रमण श्रेष्ठले ५ घण्टा समय मागेपछि प्रधानन्यायाधीश चोलेन्द्र शमशेर राणा र उनीबीच केहीबेर यही विषयमा गलफती चल्यो ।

बहसका लागि श्रेष्ठ आउनेबित्तिकै चोलेन्द्रले १५ मिनेटमा बहस सक्न आग्रह गरे । तर श्रेष्ठले प्रतिवाद गर्दै आफूलाई १५ मिनेटले नपुग्ने बताए । 
त्यसपछि राणाले सोधे तपाईँलाई कति समय चाहिन्छ ?

जवाफमा श्रेष्ठले आफूलाई ‘५ घण्टा समय चहिने’ बताए । राणाले ५ घण्टा समय दिनै नसक्ने भन्दै असहमति जनाए । तर, श्रेष्ठले प्रतिवाद गर्दै भने, ‘मेरो पुरानो कुरा होइन । सबै नयाँ कुरा राख्छु । मलाई ५ घण्टा समय नै चाहिन्छ ।’राणाले प्रतिवाद गर्दै फेरि भने, ‘तपाई विद्वानहरु ३ घण्टा, ३ वर्षसम्म पनि बहस गर्नुहुन्छ होला । यसरी मुद्दाको फैसला कसरी गर्न सकिन्छ ? समयको ख्याल गरिदिनुस् ।’तर श्रेष्ठले अड्डी कसेपछि राणाले केही लचक बनेर भने, ‘त्यसो भए एक घण्टामा टुंग्याउनुस् ।’ श्रेष्ठले एक घण्टा होइन बहस गर्दै जान्छु ५ घण्टा पनि लाग्न सक्छ भन्दै अहिले बहस गरिरहेका छन् । 

इजलासमा अधिवक्ताहरुले लामो बहस गरेपनि समयमा कडाइ गरिँदै आएको छ । तर, वरिष्ठ अधिवक्ताहरुले लामो समय लिँदा मुद्दाको सुनुवाइ प्रक्रिया ढिलो भइरहेको छ ।