‘प्रहरी मेरो साथी हो, नेकपा प्रहरी मुर्दावाद’

सफल खबर संवाददाता

सोमबार, १२ माघ २०७७, १७ : १२
‘प्रहरी मेरो साथी हो, नेकपा प्रहरी मुर्दावाद’

काठमाडौँ । प्रहरीले लाठीचार्ज गर्दै उनीहरुलाई लखेट्न थाल्यो । प्रहरीको बल प्रयोगपछि उनीहरुले नारा  लगाए, ‘प्रहरी मेरो साथी हो, नेकपा प्रहरी मुर्दावाद ।’

प्रतिगमनविरूद्ध आन्दोलनरत बृहत् नागरिक आन्दोलनमाथि सोमबार बालुवाटारमा प्रहरीले लाठीचार्ज गरेपछि यस्तो नारा लागेको हो । कमलपोखरी बचाउ अभियानका अभियन्तासहितको जुलुसका सहभागीले कमलपोखरीको माटोको टीका लगाएर कमलपोखरीबाट बालुवाटारसम्म मार्चपास गरेका थिए ।

प्रतिनिधिसभा विघटन गर्ने प्रधानमन्त्री केपी शर्मा ओलीको निर्णयको विरोध गर्दै बालुवाटार घेराउ गर्न पुगेका नागरिक अगुवाको समूहमाथि प्रहरीले ब्यापक बल प्रयोग गरेको छ ।

कार्यक्रममा कवि, लेखक, कलाकार, संगीतकर्मी, बौद्धिक, पेशाकर्मी एवं नागरिक अभियन्ताको सहभागिता थियो । उनीहरूले नाराबाजी समेत गरेको र निषेधित क्षेत्रमा प्रदर्शन गरेको भन्दै पानीको फोहोराले हानिएको प्रहरीले जनाएको छ ।

संसद विघटनलगायत सबै प्रकारका प्रतिगमनको विरूद्ध अभियन्ताले सशक्त प्रतिकार गर्दै मुलुकलाई स्वस्थ्य र न्यायपूर्ण बाटोमा फर्काउन सबै सचेत नागरिकको कर्तव्य रहेको बताएका छन् । प्रतिनिधिसभा विघटनबिरुद्ध नागरिक अगुवाहरु केही सातादेखि निरन्तर आन्दोलनमा छन् ।

प्रतिक्रिया दिनुहोस