‘जसपा’ को टिप्पणीप्रति प्रधानमन्त्रीको सचिवालयको गम्भीर आपत्ति

काठमाडौं । प्रधानमन्त्रीलाई शारीरिक र मानसिक दृष्टिले अत्यन्त कमजोर रहेको भनी जनता समाजवादी पार्टीले गरेको टिप्पणीमा प्रधानमन्त्रीको सचिवालयले आपत्ति जनाएको छ । प्रधानमन्त्रीबारे गरिएको त्यस्तो टिप्पणी अशिष्ट र पूर्वाग्रही रहेको भन्दै प्रधानमन्त्रीको सचिवालयले खेद जनाएको छ । 

प्रधानमन्त्रीका प्रेस सल्लाहकार सूर्य थापाले मंगलवार एक प्रेस नोट जारी गर्दै जनता समाजवादीको टिप्पणीलाई कुण्ठाग्रस्त गालीगलौज र दिवालियापन भएको भन्दै निन्दा गरेका छन् । जनता समाजवादी पार्टीको केन्द्रीय कार्यकारिणी समितिको बैठकपछि साउन २५ गते जारी विज्ञप्तीमा ‘प्रधानमन्त्री ओली शारीरिक र मानसिक दृष्टिले अत्यन्तै कमजोर रहेको’ र ‘देशभित्र विभाजनको बीउ रोप्ने कार्य’ गरेको उल्लेख थियो ।

थापाले प्रेस नोट जारी गर्दै लेखेका छन्, ‘पटकपटक राज्यका जिम्मेवार तहमा रहिसकेका र प्रधानमन्त्रीको समेत जिम्मेवारी सम्हालिसकेका, अझ आफूलाई सुशिक्षित भनेर चिनाउन रूचाउनेहरू संलग्न दलबाट यस स्तरको तरिका खासमा कुण्ठाग्रस्त गालीगलौज मात्र हो र सोचको दिवालियापन नै हो ।’

जसपा एकता पूर्वका तत्कालिन पार्टी विभाजन गर्न सरकारले गत वैशाख ८ मा दल विभाजन सम्बन्धि अध्यादेश ल्याएको र पार्टी विभाजन गर्न आफु निकट नेता महेश बस्नेत, किसान श्रेष्ठ र प्रहरीका पूर्व महानिरीक्षक सर्वेन्द्र खनाल लगायत प्रयोग भएपछि जनता समाजवादी प्रधानमन्त्रीसँग असन्तुष्ट छ । केन्द्रीय कार्यकारीणी समिति बैठकमा प्रधानमन्त्री ओलीको कार्यशैली र सरकारको कामको समिक्षा गर्दै जसपाले प्रधानमन्त्रीमाथी त्यस्तो टिप्पणी गरेको वक्तब्य जारी गरेको थियो । 

त्यसपछि प्रधानमन्त्रीको सचिवालयलाई जसपाको त्यसखालको टिप्पणी प्रति असैह्य भएको हो । प्रधानमन्त्रीका प्रेस सल्लाहकार थापाले त्यसपछि नै मंगलबार प्रेस नोट जारी गर्दै वक्तब्यमा उल्लेखित भाषाप्रति आपत्ति जनाएको हो । 
थापाको विज्ञप्तीमा भनिएको छ, ‘राजनीतिमा विवाद, मतभेद र असहमतिहरू हुन्छन्, जसलाई स्वाभाविक नै मानिन्छ । त्यसै आधारमा यस स्तरको अपसंस्कारको प्रदर्शनबाट कहाँ पुगिन्छ ? सम्बन्धित व्यक्ति र पक्षहरूले नै हेक्का राख्नु श्रेयष्कर होला ।’

थापाले निहीत स्वार्थ पूरा गर्न ओलीलाई बाधक देख्नेहरूले विगत छ दशकयता यसो गर्दै आएको र यो कुनै नौलो कुरा नभएको पनि बताएका छन् । ‘त्यस्ता तत्वहरू इतिहासको गतिमा सीमित भइसकेका छन् । अरूबाट निर्देशित कदम, गलत नीति, विचार र व्यवहारले कोही कसैलाई सफलता हासिल हुँदैन भन्ने जगजाहेर छ । शीशाको घरमा बसेर ढुंगा हान्नेहरू आफैं असुरक्षित र पतन हुनु अनिवार्य छ ।’ थापाले जारी गरेको प्रेस नोटमा उल्लेख छ ।