विप्लवका मेची महाकाली इन्चार्ज ओमप्रकाश पुन पक्राउ

काठमाडौं । नेत्रविक्रम चन्द नेतृत्वको नेकपाका एक जना प्रभावशाली नेता ओमप्रकाश पुन (निर्माण) प्रक्राउ परेका छन् । उनी विप्लवको पार्टीको मेची महाकाली इन्चार्ज हुन् । 

पुनलाई धनगढी आसपासबाटै प्रहरीले पक्राउ गरेको हो । प्रहरीले घटनाबारे अहिलेसम्म औपचारिक रुपमा कुनै जानकारी त दिएको छैन । तर विप्लवका पार्टीका एक नेताले उनी पक्राउ परेको बताए । ‘उहाँ धनगढीबाट पक्राउ पर्नुभएको सूचना आएको छ’, ति नेताले भने । 

पुनलाई प्रहरीले केही दिन देखि पिछा गरिरहेको थियो । फुलबारीबाट धनगढी आउने क्रममा उनलाई कनरीबाट पक्राउ गरिएको प्रहरी स्रोतले बताएको छ । पुनसँगै अखिल नेपाल महिला संघकी नेतृ पूर्णिमा धामी पनि पक्राउ परेकी छन् । धामी पुनकी श्रीमती हुन् ।

जिल्ला प्रहरी कार्यालय कैलालीका प्रवक्ता प्रहरी नायव उपरीक्षक प्रतिक बिष्टले एक महिला र एक पुरुष गरि दुई जनालाई केही बेर अघि पक्राउ गरिएको बताए । तर उनले कुन स्तरका नेता भन्ने बारेमा भने केही थाहा भईनसकेको बताए ।