सार्वजनिक यातायात सञ्चालन गर्न सरकारसँग व्यवसायीको विभिन्न माग, माग पूरा नगरे सवारी नचलाउने चेतावनी

काठमाडौं । सार्वजनिक यातायात सञ्चालन गर्न सरकार सामु यातायात व्यवसायीहरुले विभिन्न माग राखेका छन् । व्यवसायीले लकडाउनभरीको बिमा, ब्याज र केही अनुदान दिन सरकारसँग माग गरेका छन् । 

आज शुक्रबार रिपोटर्स क्लब नेपालमा पत्रकार सम्मेलन गर्दै सार्वजनिक यातायात केन्द्रीय महासंघले सरकारले अग्रिम तयारी नगरी एक्कासी गाडी चलाउन निर्देशन दिएको जनाएको छ ।

आफूहरुले सरकारलाई सहयोग गर्न चाहँदाचाहँदै पनि आपसी सल्लाह नगरिकन एकतर्फी रुपमा यातायात सञ्चालन गराउन खोजेको आरोप व्यवसायीको छ ।

महासंघले राखेको अरु शर्तहरुमा सार्वजनिक यातायातका सबै सवारी साधनलाई विश्व स्वास्थ्य संगठनले तोकेको सम्पूर्ण जिम्मेवारी नेपाल सरकारले व्यवस्था गर्नुपर्ने र यातायात मजदुरको स्वास्थ्य सुरक्षा सम्बन्धि सम्पूर्ण व्यवस्था हुनुपर्ने माग रहेको छ ।

यस्तै बैंक किस्ता तथा ब्याजदर पूर्ण सरलीकरण हुनुपर्ने,  चारमहिनाको बन्दाबन्दी अवधिको ब्याज छुट र थप चार महिनाको गाडी सञ्चालन भएतापनि किस्ता तिर्न नसक्ने हुँदा किस्ता तिर्ने अवधि बढाएर असोज मसान्तसम्म पुर्याउनु पर्ने,  साना, ठुला, मझौला सवारी साधनको  सिट मापदण्ड अनुसार यात्रु राखेर सञ्चालन गर्न नसकिने, कर छुट हुनुपर्ने तथा एक वर्षसम्म जरिवाना नलाग्ने व्यवस्था गर्नुपर्ने, लकडाउनको बीमा प्रिमियम अवधिको छुट हुनुपर्ने लगायतका माग व्यवसायीले राखेका छन् । यी माग पुरा भएमात्र सार्वजनिक सवारी चलाउने भनिएको छ । यदि सरकारले माग पुरा गर्न नसके आफूहरुले नचलाई सरकालाई नै तालाचाबी बुझाउने महासघंले चेतावनी दिएको छ ।