भारतबाट नेपाल फर्किन एम्बुलेन्सको सहारा

काठमाडौं । भारत सरकारले देशव्यापी लकडाउनलाई थप दुई साताका लागि लम्ब्याउने निर्णय गरेसँगै उपचारका लागि भारतको राजधानी नयाँदिल्ली लगायतका विभिन्न सहरमा रोकिएका बिरामी र तिनका आफन्तहरु एम्बुलेन्सबाट धमाधम फर्किन थालेका छन् । 

यसरी फर्किनेमा अधिकांश क्यान्सरका बिरामी र उनीहरुका आफन्त रहेका छन् । ‘धेरै भएको थियो घर नगएको । फेरि यो लकडाउन कहिले सकिने हो टुंगो भएन, त्यही भएर जान लागेका हौं ।’, एम्बुलेन्स रिजर्भ गरेर नेपाल जान लागेका खड्गबहादुर राईले भने ।

झापा दमकका उनी श्रीमतीको क्यान्सर उपचारका लागि ११ महिनाअघि भारत आएका थिए । भारतमा मार्च २४ देखि लकडाउन भएपछि अस्पतालमा उपचारका लागि आएका सयौंको संख्याका बिरामी र आफन्त रोकिएको अनुमान गरिएको कान्तिपुरमा खबर छापिएको छ ।