मेघगर्जन, चट्याङ्ग तथा हावाहुरी सहित वर्षाको सम्भावना

काठमाडौँ । जल तथा मौसम पूर्वानुमान महाशाखाले देशभरको मौसम आइतबार आंशिकदेखि सामान्य बदली हुने जनाएको छ । अहिले देशको पहाडी क्षेत्रमा सामान्य बदली र बाँकी क्षेत्रमा आंशिक बदलीको अवस्था छ ।

पश्चिमी वायु तथा स्थानीय वायुको प्रभावका कारण मौसम बदली भएको हो । यस्तै पूर्वी भू–भाग नजिक बनेको न्यून चापिय क्षेत्रको प्रभाव रहनुका साथै तथा बंगालको खाडी र अरब सागरबाट समेत जलवाष्पयुक्त वायु नेपालमा प्रवेश गरिरहेको मौसमविदले बताएका छन् ।

आइतबार दिउँसो देशको अधिकांश क्षेत्रमा सामान्य बदली रही केही स्थानमा मेघगर्जन र चट्याङ्ग तथा असिना र हावाहुरी सहित वर्षाको सम्भावना रहेको जनाइएको छ ।

राति पनि देशको अधिकांश क्षेत्रमा सामान्य बदली रही पश्चिमी र मध्य भू–भागका केही स्थानमा तथा पूर्वका थोरै स्थानमा मेघगर्जन र चट्याङ्ग तथा असिना र हावाहुरी सहित वर्षाको सम्भावना रहेको मौसमविदले बताएका छन् ।