लिपुलेक लगायतका भू-भाग फिर्ताका लागि कूटनीतिक पहल तीव्र बनाउन विपक्षीको दबाब

काठमाडौँ । नेपालका विभिन्न विपक्षी दलका सांसदहरूले लिपुलेक, लिम्पियाधुरा र कालापानीलगायतका नेपाली भूभाग फिर्ता ल्याउन सरकारले थप सक्रिय कूटनीतिक पहल गर्नुपर्ने माग गरेका छन् ।

सिंहदरबारमा बिहीबार बसेको प्रतिनिधि सभा अन्तर्गतको अन्तर्राष्ट्रिय सम्बन्ध तथा पर्यटन समितिको बैठकमा सांसदहरूले भारत-चीनबीच उक्त क्षेत्रलाई व्यापारिक मार्गका रूपमा प्रयोग गरिएको विषयप्रति आपत्ति जनाउँदै नेपालले आफ्नो दाबीलाई प्रभावकारी रूपमा अघि बढाउनुपर्नेमा जोड दिएका हुन् ।

बैठकमा प्रमुख प्रतिपक्ष दल नेपाली काँग्रेसका सांसद सन्दीप रानाले लिपुलेक, लिम्पियाधुरा र कालापानी क्षेत्र नेपालकै भूभाग भएको स्पष्ट पार्दै दुवै छिमेकी मुलुकसँग प्रत्यक्ष संवादमार्फत समाधान खोज्न सरकार ढिला गर्न नहुने धारणा राखे ।