रुकुममा जनार्दन शर्मा र सूर्य थापाबीच किन भयो घम्साघम्सी ?

काठमाडौं । फागुन ४ गते ‘जनयुद्धको उद्गम स्थल’ रुकुमको चौरजहारीमा नेकपा निकट प्रेस संगठन नेपालको कर्णाली प्रदेशस्तरीय भेलाको आयोजना भएको थियो । प्रमुख अतिथि जनार्दन शर्मा थिए भने प्रचार विभागका उपप्रमुख तथा प्रधानमन्त्रीका सल्लाहकार सूर्य थापा अतिथिका रुपमा उपस्थित भएका थिए । 

नगरपालिका परिसरमा आयोजित कार्यक्रममा प्रधानमन्त्रीका सल्लाहकार थापाले मन्तव्यको ‘जनयुद्ध दिवस’प्रति आपत्ति जनाएका थिए । प्रमुख अतिथि जनार्दन शर्मा कार्यक्रममा ढिला उपस्थित भएका थिए । मन्तव्यको क्रममा सूर्य थापाले कड्किएर भने, ‘पार्टीले जनआन्दोलन र जनयुद्धका शहीदहरुको स्मृतिमा श्रद्धाञ्जलीसभा गर्ने निर्णय गरेको हो । तर, यहाँ हामी आउँदा ‘जनयुद्ध दिवस’ को ब्यानर देख्यौं । पार्टीको निर्णय तलदेखि माथिसम्म एउटै हुनुपर्दैन ? के यहाँ अलग्गै पार्टी छ ?

अन्तिम तेस्रो वक्ताका रुपमा मञ्चमा पुगेका थापाले बोल्न शुरु गर्दासम्म प्रमुख अतिथि शर्मा मञ्चमा पुगेका थिएनन् । जनयुद्ध दिवस मनाउने निर्णय पार्टीले नगरेको भन्दै रुकुमको स्थानीय कमिटीप्रति थापाले असन्तुष्टि जनाए । थापाको असन्तुष्टिप्रति खैलाबैला हुन थाल्यो । 

थापाले जनयुद्ध दिवसप्रति असहमति जनाउँदै बोलिरहँदा मञ्चमा अध्यक्ष प्रचण्डका प्रेस संयोजकसमेत रहेका प्रेस संगठनका नेता विष्णु सापकोटा जुगल आक्रोशित बनिरहेका थिए । यतिक्कैमा प्रमुख अतिथि जनार्दन शर्मा कार्यक्रमस्थलमा आइपुगे । नेता जनार्दनले  किन खैलाबैला भएको भन्नेकुरा सोधे । 

थापाले जनयुद्धविरुद्ध बोलेको भन्दै शर्मालाई सुनाएपछि मञ्चमै शर्मा जंगिए । उनले प्रधानमन्त्री केपी ओलीलाई आफैँले प्रधानमन्त्री बनाएको समेत दावी गरे । रुकुमबाट निर्वाचित सांसदसमेत रहेका शर्माले शहीदको अपमान हुने खालका अभिव्यक्ति सैह्य नहुने चेतावनी दिए ।

शर्माले बाहिर निस्किएर नेकपाको राजनीतिक प्रतिवेदन ल्याएर मञ्चमा २६ मिनेट बोल्दा अधिकांश समय थापाका अभिव्यक्तिको खण्डन गरेका थिए । उनले राजनीतिक दस्तावेज लेख्ने एक सदस्य आफू रहेको भन्दै त्यहाँ उल्लेखित जनयुद्धको योगदानको बुँदा पढेर सुनाए ।

‘यस्ता व्यक्तिहरु पार्टी एकता नचाहने हुन्’ भन्दै थापाको शर्माले नाम नलिई खोइरो खने । दुई नेताको जुहारी कडा रुपमा भएको खबर नेकपाका अध्यक्ष पुष्पकमल दाहालसम्म पुगेको छ । 
शर्मा चौरजहारीको सो कार्यक्रमबाट पार्टीको कर्णाली भेलाको आयोजना गर्न सिधै सुर्खेत पुगेका थिए । प्रचण्ड, माधव नेपाल, विष्णु पौडेललगायतका नेता मंगलबार सुर्खेत पुगेका बेला यसबारे चर्चा भएको थियो । यस विषयमा अध्यक्ष प्रचण्डले प्रधानमन्त्री ओलीसम्म पुगेर आपत्ति प्रकट गर्ने स्रोतले जनाएको छ ।