महरालाई मेरो कारणले होइन्, राजनीतिक षडयन्त्रका कारण जेल हालिएको हो : रोशनी शाही

काठमाडौं । पूर्व सभामुख कृष्णबहादुर महरामाथि बलात्कारको आरोप लगाएकी संसद सचिवालयकी कर्मचारी रोशनी शाहीले महरालाई सफाइ दिएर अदालत आफूहरु दुवै जनालाई न्याय गरेको बताएकी छिन् ।

सोमबार काठमाडौँ जिल्ला अदालतले बलात्कार प्रयासको मुद्दामा महरालाई सफाइ दिएपछि शाहीले यस्तो प्रतिक्रिया दिएकी हुन् । उनले भनिन्, ‘महरा सरकारले न्याय पाउनुभएको छ । मैले पनि न्याय पाएकी छु । अदालतको फैसलाबाट दुःख दिन खोज्नेहरु पराजित भएका छन् ।’  

यस अघि महराले आफूलाई बलात्कार प्रयास गरेको भन्दै रोशनी मिडियामा आएपछि प्रहरीले महरालाई पक्राउ गरेको थियो । तर पछि रोशनीले बयान फेर्दै आएकी थिइन् । उनले आफूले मानसिक सन्तुलन गुमाएका बेला महरामाथि सो आरोप लगाए पनि त्यसयता लगातार घटना भएको होइन भनेर बयान दिँदै आए पनि महरालाई जेल हालिएको बताइन् ।

रोशनीले महरालाई आफ्नो कारण नभई राजनीतिक षडयन्त्रका कारण जेल हालिएको बताइन् । महरा आफ्नो अभिभावक भएकाले अब पनि महरासँगको पहिले जस्तै राम्रो रहने बताइन् ।