चीनबाट ल्याउने नेपालीलाई राख्ने ठाउँ नभए संसद भवन छ नि !

काठमाडौं । सरकारले चीनबाट अझै विद्यार्थी ल्याउन सकेको छैन । सरकार ल्याएका विद्यार्थीहरुलाई राख्ने ठाउँ पाइरहेको छैन । 

यसैबीच समाजवादी पार्टीका सांसद प्रदीप यादवले चीनबाट उद्दार गरी ल्याउने नेपालीलाई राख्ने ठाउँ नपाए संसद भवन खाली गर्न प्रस्ताव गरेका छन् ।

मंगलबार प्रतिनिधिसभाको बैठकमा उनले सरकारले पाँच दिनदेखि लगातार खोज्दा पनि चीनबाट ल्याउने नेपालीलाई राख्ने ठाउँ नपाउनु दुखद भएको बताए । बैठकमा उनले भने, ‘सभामुख महोदय संसद भवन नै खाली गरौँ, चीनबाट ल्याउने नेपाीलाई कहाँ राख्ने त ? सरकारले पाँच दिनदेखि लगातार खोजिरहेको छ तर तर ठाउँ नै पाएको छैन ।’ 

संसद भवन खाली गरेर विद्यार्थी राख्ने अनि बाहिर पालमा संसद चलाउन सकिने उनले बताए । सांसद यादवले चीनमा रहेका विद्यार्थीलाई लिन जहाज कहिले उड्छ भनी प्रश्नसमेत गरे ।