महानगरलाई शैक्षिक हब बनाउने प्रयास सफल बन्दैछ : मेयर दाहाल

चितवन । भरतपुर महानगरपालिका प्रमुख रेनु दाहालले चितवनसहित महानगरलाई शैक्षिक हब बनाउने प्रयास सफल हुँदै गएको बताएकी छिन । महानगरको नयाँ शैक्षिक गन्तव्य निर्धारण गोष्ठीमा उनले रामपुरमा इन्जिनियरिङ क्याम्पस ल्याउन सफल भएको, भरतपुर २३ मा बहुप्राविधिक विद्यालय स्थापनाको काम धमाधम भईरहनु पनि शैक्षिक विकासमा एउटा खुड्किलो चढेको बताइन् । 
खुल्ला विश्वविद्यालय महानगरमा ल्याउने प्रयास जारी रहेको दाहालले बताइन् । जग्गा निरिक्षण लगायतका काम अघि बढेको सुनाउँदै उनले महानगरमा खुल्ला विश्वविद्यालय आएमा शैक्षिक हब बनाउने प्रयासमा अर्को इँटा थपिने बताइन् । 
महानगरको शैक्षिक विकासका लागि महानगरको कुल बजेटको १५ प्रतिशत शिक्षा क्षेत्रमा छुट्याएको बताउँदै उनले आगामी वर्ष थप्दै लैजाने बताइन् । उनले महानगरमा रहेका सामुदायिक विद्यालयलाई प्रविधिमैत्री बनाउने लक्ष्य अनुरुप एक एक वटा ल्यापटप दिने कार्यक्रम अघि सारिएको जानकारी दिइन् ।