सल्यान ।  सङ्घीय सरकारका ऊर्जा, जलस्रोत तथा सिँचाइमन्त्री वर्षमान पुनले दुई वर्षभित्र कर्णालीको कुनै पनि नागरिक अँध्यारोमा बस्न नपर्ने बताउनुभएको छ । 

नेपाल पत्रकार महासङ्घ सल्यानले सल्यानको बरलामा आयोजना गरेको पत्रकार सम्मेलनमा मन्त्री पुनले आगामी दुईवर्षभित्रमा कर्णाली उज्यालो बनाउने उद्घोष गर्नुभएको छ । 

कर्णाली प्रदेशका सबै बस्तीमा विद्युत् पुर्‍याउनका लागि सङ्घीय सरकारले युद्धस्तरमा काम गरिरहेको मन्त्री पुनको भनाइ थियो ।  

‘कर्णाली प्रदेशका ६१ प्रतिशत नागरिक अहिले पनि विद्युत्को पहुँचबाट बाहिर रहेका छन् । सरकारले विद्युतीकरणलाई प्राथमिकता दिएर काम अगाडि बढाइरहेको छ अब कुनै पनि नागरिक विद्युत् सेवाबाट वञ्चित हुनुपर्दैन,’ मन्त्री पुनले भने । अहिले कर्णालीका सबै बस्तीमा विद्युत् पुर्‍याउनका लागि सङ्घ, प्रदेश र स्थानीय सरकारले बजेट विनियोजन गरी काम अगाडि बढाइरहेको पनि मन्त्री पुनले जानकारी दिए ।

कर्णाली प्रदेशका आर्थिक मामिला तथा योजनामन्त्री प्रकाश ज्वालाले कर्णाली प्रदेशले विद्युतीकरणलाई पहिलो प्राथमिकता दिएको जानकारी दिए ।