उपराष्ट्रपति यादव र युरोपेली संघकी राजदूतबीच द्विपक्षीय सहकार्यबारे छलफल

काठमाडौँ । उपराष्ट्रपति रामसहायप्रसाद यादव र युरोपेली संघकी राजदूत भेरोनिक लोरेन्जोबीच सोमबार शिष्टाचार भेटवार्ता सम्पन्न भएको छ। लैनचौरस्थित उपराष्ट्रपतिको कार्यालयमा भएको भेटमा पारस्परिक सम्बन्ध र सहकार्यका विविध पक्षमा विचार आदान-प्रदान गरिएको जनाइएको छ।

भेटका क्रममा उपराष्ट्रपति यादवले नेपाल र युरोपेली संघबीच सन् १९७४ देखि निरन्तर रहँदै आएको मैत्रीपूर्ण सम्बन्धप्रति सकारात्मक धारणा व्यक्त गर्दै द्विपक्षीय सहकार्यलाई नेपालले प्राथमिकतामा राखेको उल्लेख गरे। स्वास्थ्य, शिक्षा, ऊर्जा तथा ग्रामीण विकासका क्षेत्रमा युरोपेली संघको सहयोग उपयोगी रहेको उल्लेख गर्दै आगामी दिनमा उत्पादनमूलक क्षेत्रतर्फ सहकार्य विस्तार हुने अपेक्षा व्यक्त गरिएको छ।

विशेष गरी कर्णाली प्रदेशमा सञ्चालनमा रहेका सहयोगमुखी कार्यक्रमहरूले दुर्गम क्षेत्रका बासिन्दालाई प्रत्यक्ष लाभ पुगेको उल्लेख गर्दै उनले लोकतन्त्र, स्वतन्त्रता तथा बहुपक्षीय सहकार्यजस्ता साझा मूल्यमा दुवै पक्षको प्रतिबद्धता रहेको धारणा राखे।