सुकुम्वासी तथा अव्यवस्थित बसोबासीलाई संगठित गर्न श्रम संस्कृति पार्टीद्वारा अभियान घोषणा

काठमाडौँ । श्रम संस्कृति पार्टीले देशभरका सुकुम्वासी तथा अव्यवस्थित बसोबासी समुदायलाई संगठित गर्ने अभियान सञ्चालन गर्ने जनाएको छ।

सरकारले विभिन्न स्थानमा सुकुम्वासी बस्ती हटाउने कार्य अघि बढाइरहेका बेला पार्टी अध्यक्ष हर्क साम्पाङले संगठनका जिल्ला तथा स्थानीय तहका समितिहरूलाई अभियान प्रभावकारी रूपमा सञ्चालन गर्न निर्देशन दिएका हुन्।

साम्पाङले देशका विभिन्न क्षेत्रमा रहेका सुकुम्वासी र अव्यवस्थित बसोबासीलाई एकताबद्ध गर्दै संरचित रूपमा संगठित गर्न आवश्यक रहेको उल्लेख गरेका छन्। सो अभियानको समन्वय श्रम संस्कृति पार्टीले गर्ने पनि उनले बताएका छन्।

उनले मुलुक सबै नागरिकको साझा भएको उल्लेख गर्दै आर्थिक रूपमा कमजोर तथा सीमान्तकृत समुदायका पक्षमा उभिन पार्टी कार्यकर्ता तथा अभियन्तालाई आग्रह गरेका छन्।

साथै, सुकुम्वासी र अव्यवस्थित बसोबासीलाई सचेत, एकताबद्ध र संगठित रहन आह्वान गर्दै वर्तमान सरकारी कार्यशैलीप्रति असन्तुष्टि पनि व्यक्त गरेका छन्।