प्रधानमन्त्री अनुपस्थित रहेको भन्दै श्रम संस्कृति पार्टीद्वारा संसद् बैठक बहिष्कार

काठमाडौँ । आगामी आर्थिक वर्षको नीति तथा कार्यक्रममाथिको छलफलका क्रममा प्रधानमन्त्री वालेन्द्र शाह (बालेन) प्रतिनिधि सभा बैठकमा उपस्थित नभएको विषयलाई लिएर श्रम संस्कृति पार्टीले बैठक बहिष्कार गरेको छ।

पार्टी अध्यक्ष हर्क साम्पाङसहितका सांसदहरू प्रधानमन्त्रीको अनुपस्थितिप्रति असन्तुष्टि जनाउँदै बैठक कक्षबाट बाहिरिएका हुन्।

प्रतिनिधि सभामा नीति तथा कार्यक्रममाथि उठेका प्रश्नको जवाफ दिने कार्यसूची रहेको अवस्थामा प्रधानमन्त्री उपस्थित नभएको भन्दै विपक्षी दलहरूले आपत्ति जनाएका छन्। उनीहरूले प्रधानमन्त्रीले सदनप्रति जबाफदेही हुनुपर्ने धारणा राख्दै राजीनामासमेत माग गरेका छन्।

बैठकमा प्रधानमन्त्रीको तर्फबाट अर्थमन्त्री डा. स्वर्णिम वाग्लेले जवाफ दिने तयारी गरेपछि विपक्षी सांसदहरूले विरोध जनाएका थिए। त्यसक्रममा प्रधानमन्त्रीको उपस्थितिको माग गर्दै सदनमा नाराबाजीसमेत भएको थियो।