निजी सञ्चारमाध्यममा सरकारी विज्ञापन रोक्ने निर्णय फिर्ता लिन जसपा नेपालको आग्रह

काठमाडौँ । जनता समाजवादी पार्टी, नेपालले निजी सञ्चारमाध्यममा सरकारी विज्ञापन वितरण रोक्ने सरकारी निर्णयप्रति आपत्ति जनाउँदै त्यसलाई तत्काल पुनर्विचार गर्न आग्रह गरेको छ।

पार्टी अध्यक्ष उपेन्द्र यादवद्वारा जारी वक्तव्यमा स्वतन्त्र सञ्चार क्षेत्रलाई लोकतान्त्रिक प्रणालीको आधारभूत स्तम्भका रूपमा व्याख्या गर्दै यस्तो निर्णयले प्रेस स्वतन्त्रतामा प्रतिकूल प्रभाव पार्ने उल्लेख गरिएको छ। विज्ञप्तिमा निजी सञ्चारमाध्यमलाई लक्षित गरी विज्ञापन रोक्नु स्वतन्त्र पत्रकारितामाथि नियन्त्रण स्थापित गर्ने प्रयासका रूपमा चित्रित गरिएको छ।

जसपा नेपालले विशेष गरी आर्थिक चुनौती सामना गरिरहेका सञ्चार संस्थाहरूलाई यस्तो नीतिले थप दबाबमा पार्ने भन्दै चिन्ता व्यक्त गरेको छ। पार्टीका अनुसार यस कदमले सञ्चारमाध्यमको सञ्चालनमा अवरोध सिर्जना गर्न सक्ने र श्रमजीवी पत्रकारहरूको रोजगारीमा समेत असर पुग्ने अवस्था निम्तिन सक्छ।

उक्त निर्णयले अभिव्यक्ति स्वतन्त्रता तथा सूचनाको स्वतन्त्र प्रवाहमा अवरोध पुर्‍याउने जोखिम औँल्याउँदै पार्टीले सरकारलाई प्रेसमैत्री नीतिगत दृष्टिकोण अपनाउन र निर्णय फिर्ता लिन माग गरेको छ।