संसदमा अभिव्यक्तिमाथि विवाद, रेकर्ड हटाउन माग

काठमाडौँ । प्रतिनिधि सभाको बैठकमा पूर्वप्रधानमन्त्री केपी शर्मा ओलीसँग सम्बन्धित विषय उठेपछि सत्तारूढ र विपक्षी दलका सांसदहरूबीच तीव्र मतभेद देखिएको छ।

एमाले सांसदहरूले ओली र पूर्वगृहमन्त्री रमेश लेखकको पक्राउप्रति असहमति जनाउँदै उनीहरूको रिहाइका लागि निरन्तर माग राख्दै आएका छन्। अर्कोतर्फ राष्ट्रिय स्वतन्त्र पार्टी (रास्वपा)का सांसदहरूले जेन जेड आन्दोलनका क्रममा भएको दमनका विषयमा दोषीमाथि कारवाही हुनुपर्ने धारणा व्यक्त गरेका छन्।

बुधबारको बैठकमा रास्वपाका सांसद पुरुषोत्तम सुप्रभात यादवले उक्त आन्दोलनलाई न्याय, समानता र अधिकारसँग जोडिएको विषयका रूपमा उल्लेख गर्दै आन्दोलनका पीडित र प्रभावितलाई न्याय दिनुपर्ने आवश्यकता औँल्याए। उनले आन्दोलनका घाइतेको रोजगारी सुनिश्चितता र मृतक परिवारलाई क्षतिपूर्ति उपलब्ध गराउने विषयमा सरकारको ध्यानाकर्षण गराएका थिए।

यही क्रममा उनले पूर्वप्रधानमन्त्री ओलीबारे प्रयोग गरेको केही अभिव्यक्तिप्रति एमाले पक्षले आपत्ति जनाएको छ। एमाले सांसद साजिदा खातुन सिद्धिकीले उक्त अभिव्यक्तिलाई असंसदीय भन्दै रेकर्डबाट हटाउन माग गरिन्। साथै उनले ओली र लेखकको रिहाइका लागि पुनः आग्रहसमेत गरिन्।