सातामा दुई दिन बिदाको निर्णय आजदेखि लागू, कार्यालय समय पनि परिवर्तन

काठमाडौ । नेपाल सरकारले सातामा दुई दिन सार्वजनिक बिदा दिने निर्णयलाई राजपत्रमार्फत औपचारिक रूपमा लागू गरेको छ ।

गृह मन्त्रालयले प्रकाशित गरेको सूचनाअनुसार आजदेखि लागू हुने गरी शनिबार र आइतबार सार्वजनिक बिदा दिने व्यवस्था गरिएको हो ।

नयाँ व्यवस्थाअनुसार अब सरकारी कार्यालय, सार्वजनिक निकाय तथा शैक्षिक संस्थाहरूमा सातामा दुई दिन बिदा हुनेछ । बिदासँगै सरकारले कार्यालय समयसमेत परिमार्जन गरेको छ । आजदेखि सरकारी कार्यालयहरू बिहान ९ बजेदेखि अपराह्न ५ बजेसम्म सञ्चालन हुनेछन् ।

यस्तै, हिउँदयाम (कात्तिक १६ देखि माघ १५ गतेसम्म) मा भने कार्यालय समय बिहान ९ बजेदेखि अपराह्न ४ बजेसम्म कायम रहने राजपत्रमा उल्लेख गरिएको छ ।